Edukasyon diha sa galamhan ni Ryan

Unsa nay nahitabo ni Ryan Racal human siya nahimong finalist sa Search for a Star in a Million sa ABS-CBN usa ka tuig ang milabay? Hain na siya ug unsay nahimo niyang career karon? Kini maong mga pangutana maoy gipangitaan og tubag sa Banat Hugyaw, hinungdan nga among gisuhid ang mga nagkuros nga gagmay'ng dalan sa barangay Pasil diin si Ryan residente.

Pinaagi sa iyang ig-agaw nga si Gia Racal, kinsa usa sa mga correspondents ning mantalaan nasubay og balik sa Banat Hugyaw ang labing uwahi nga kalambuan sa kinabuhi sa usa ka Ryan Racal. Ania ang mga nakoykoy nga detalye ni Gia atol sa ilang jamming niadtong Lunes.

Kon kahinumduman si Ryan Racal ang suod nga higala ni Jerome Salas sa nahisgutang Search for a Star in a Million diin hosts sila si Mark Bautista, Rachelle Ann Go, Sheryn Regis ug Erik Santos. Nalig-on ang panahigalaay ni Ryan ug Jerome sanglit pareho silang mga bisaya busa sila maoy kanunay nga nag-uban samtang nagpadayon pa ang nahisgutang bangga. Si Ryan ang matud pa susama og birado ni Concert King Martin Nievera kon pagkanta na ang hisgutan.

"Nalipay ko nga gikompara ko ni Martin Nievera nga maayo mo kanta ug kompositor usab kay mao man sad na ang akong idolo, flattered kaayo ko apan bati gamay nako kay ang mga judge mag sige man gyud og ingon nga mura gyud kono ko og Martin mo kanta. What I mean is gusto nako nga maila ko nga ako kay Martin is Martin already naa na siya'y ngalan sa industriya sa musika. Pero dili nato malikayan kay ila man sad to komento," pakig-jamming ni Ryan.

Human sa indigay si Ryan mibalik dinhi sa Sugbu aron ipadayon ang iyang pagtungha diin, nursing junior na siya karon sa Gullas College of Medicine. Matod pa ni Ryan gihatagan una niya og tumang atensyon ang iyang pagtuon tungod kay nabiyaan kini niya dihang nanimpad pa siya sa nahisgutang contest.

"Gusto nako nga mahuman ang akong pagtuon kay gibiyaan man gyud ni nako, unya dili man sad ko kaayo busy sa pagkakaron, maayo gyud nga mobalik sa pag-eskwela before uwahi ang tanan kay ang pagtuon dili man makuha ni bisan kinsa naa gyud na nimo kanunay," pagtin-aw ni Ryan.

Hinoon wala gayud siya hingpit nga mitalikod sa showbiz tungod kay matag karon ug unya duna man siyay mga mini-concert dinhi ug sa gawas sa Sugbu. Gani niadtong milabay nga Sabado kauban niya si Jerome alang sa usa ka pasundayag didto sa lungsod sa Naga. Gitug-an niya nga bag-ohay lang nahuman ang iyang kontrata ubos sa Star Records, diin matud pa ubay ubay na siya og nadawat nga mga offers gikan sa laing mga recording companies. Apan hugot ang baruganan ni Ryan nga humanon una niya ang iyang pagtuon aron wala na siyay hunahunaon. Gawas pa, paminaw niya maglisod ang mga solo artist og sulbong karong mga panahona nga mga rock bands ang mas gihangop sa publiko. Gani ang iyang bestfriend nga si Jerome wala pa man mopagawas og second album tungod usab kay labihan ka init sa paghangop karon nga naangkon sa mga bandang Cueshe,Kamikazee , Bamboo ug uban pa.

Kumusta na ba ang lovelife ni Ryan? Sila pa ba niadtong maanyag nga dalaga nga milugwa sa national television kauban niya dihang nagpadayon pa ang contest? "Kami lang gihapon hangtod karon strong lang gihapon ang among relationship ug naa lang gihapon siya sa akong kiliran ug andam mosuporta sa akoa anytime," saysay ni Ryan ngadto sa Hugyaw Jamming.

Sa katapusan unsay nakat-onan niya gikan sa contest? Unsay iyang mensahe alang niadtong mga nangandoy nga makaapil sa nagkadaiyang contest karon sa telebisyon?

"Strive hard lang gyud para makab-ot ang akong ambisyon pero bisan pa man nga wala ko kadaug sa maong pasundayag mapasalamaton lang gihapon ko tungod sa experience nga akong na encounter sa dihang naa pa ko sa Manila, ug ang exposure nga gihatag sa ABS-CBN. Ang ako lang ikahatag nga advice ngadto sa gustong mo apil og singing contest sa telebisyon, maningkamot og maayo, follow your heart, then kinahanglan inig uli nila sa ilang lugar naa pa siya'y balikan, like ang iyang pagtuon kinahanglan I prioritize kay importante gyud ang pagtuon."

For bookings and invitations, call Ann @09173397277