Sa pagbalik sa Cueshe

Karong mga panahona, kung maghisgot ka og banda, sigurado nga motumaw gyud ang grupo nga Cueshe. Ingon ana na kasikat ang maong Sugbuanong grupo, nga human sa pipila ka tuig nga pag-antos-kinaon og banana cue ug sa mga pagsaway sa mga taga Imperial Manila-maingon ta nga nakaangkon na gyud sila og luna sa music industry.

Gawas sa ilang good looks, ilabi na ni Jay Justiniani ug Ruben Caballero (gani giintriga man ni sila nga guwapohay ra ang ilang dating, apan gikataw-an lang sa mga miembro kay nagpasabot nga mga ambongan gyud diay kuno sila) ug sa ilang mga mugnang musika (nga ang "Stay" matawag na nga long-staying favorite sa mga Pinoy bisan pa man usa na katuig sukad kini gi-release), maingon ta nga mitunhay gyud ang maong banda tungod sa ilang kamapahiubsanon.

Sa miaging Martes, gikahimamat sa mga Cebu Press ang Cueshe didto sa Julia Restobar sa Apas, ug wala'y bisan gamay na lang nga timailhan nga sila nausab na o ba kaha nagpaka-aron-ingnon lang. Matag karon ug unya mag-sige lang og pakatawa samtang gisaysay nila sa mga taga-media ang ilang mga kaagi didto sa uluhan.

Ug tungod sa nakab-ot na karon sa maong grupo, di gyud na mawa ang suya-suya. Gani pipila naman ka higayon nga dauton sila sa ubang grupo. "The best way to beat their competitors is dauton nila. Sama namo, dauton mi nila aron ma-turn off ang mga producers," saysay pa ni Mike Manaloto (drums).

Apan nagpabilin sa industriya ang maong banda, gani niadtong Agusto gi-release naman nila ang ilang second album nga "Back To Me," usa ka tuig ug usa ka buwan ang milabay human nila gihugyaw ang tibuok nasud sa ilang first album (nga double platinum na) nga "Half Empty, Half Full" diin naapil ang sikat nga "Stay" single (Favorite Song sa 1st MYX Music Awards).

Ug kining bag-ong album, matud pa ni Fritz Labrado (bass), mas gigahinan og dako-dako nga effort sa maong grupo, ug di lang basta basta gipasagdan.

"Mas nindot na ni kay we gave time for each song aron paninduton," matud pa ni Fritz, ug pasabot pa nga moagi pa sa pre-production ang tagsa-tagsa ka awit una i-record.

Usa ug tunga sa buwan ra ang gigahin sa maong grupo sa pagmugna sa 11 ka orginal songs (silang unom dunay mga komposisyon) niining maong album (12 tanan apil na ang revival sa Jealous Guy ni John Lennon), matud pa ni Fritz, mas ikapanghambug ni nila kumpara sa nauna.

Ang "Borrowed Time" single, pananglitan, maingon ta nga mura og foreign song tungod sa iyang quality sa musika nga gigamit lakip na ang lyrics niini.

"It's all about love. Tanan tawo maka-relate," matud pa ni Fritz.

Ang Cueshe kasamtangan karong naglibot-libot sa tibuok nasud, ug sa gawas niini, may kalambigitan sa ilang promotional tour. Bag-ohay lang mipasundayag ang maong banda sa Dubai ug karong Oktubre mobalik na usab sila dinhi sa Sugbu alang sa usa ka dakong konsyerto.