SSS ang tuyo, napunta sa lain

Dili pa dugay nagsaulog ang Danao City sa ilang Karansa Festival, ug tungod kay gidapit man ni Wil Smith Banzon ang pipila niya ka mga kauban sa "Tres Metros" nagsugilon na hinoon siya sa iyang mga kauban kon nganong nahimo siyang tipik ug kabahin sa naasoy nga comedy series nga sa pagka karon, ilado na gyod kaayo ang mga artista labi na gyod ang tolo ka mga inano, Boyoyoy, Eking Bor, ug ang tandem nga magsoong sila si Estelito "Gardo" Maga ug Diosdado "Pakol" Maga.

Miasoy si Wil Smith Banzon nga ang tumong gyod unta niya, mao ra ang pag-apil sa SSS kon Search for the Southern Star, nga gipasiugdahan nila ni Novo Bono ug Sister Stella Palomo M. Apan miasoy siya nga ang nag-interview niya para sa screening nga maoy coordinator [kining tagsulat], sa pagkasayod nga nakahuman na siya'g tungha sa kurso nga Electrical Engineering ug nangita pa siya og trabaho, gipangutana siya kon gusto ba siyang mag-apprentice nga wa unay bayad isip production assistant sa nagpadayong shooting sa "Tres Metros." Kay wa man pod kono sad siya'y lingaw, mitando sad siya dayon. Karon regular na siyang may bayad isip production assistant ug gitudloan na usab siya sa cameraman, [June Philip Tar] sa hustong paggunit sa camera, kay nag-anam na man usab kadaghan ang mga proyekto sa CCTN nga nagkinahanglan og cameraman.

Makita usab si Wil Smith Banzon panagsa isip usa sa mga goons [nila ni Boyoyoy ug Eking Bor] sa "Tres Metros" apan sa mga shows sa mga artista sa "Tres Metros" usahay, pakantahon gyod siya. Kini ang hinungdan nganong wa na lang sad kono siya magtagad nga wa siya maapil sa "Search For Southern Star" ingon man sa pagpangita og trabaho, kay ang pagka cameraman usab, related man sa iyang gikuha nga kurso, gawas nga, happy kaayo siya uban sa iyang mga kauban karon nga matod niya, maoy labing importante.