Hugyaw nga Halad

Ugmang gabii ipasundayag sa kapunongang Cebu Malay Society of Composers, authors and producers (CEMSCAP) ang usa ka talagsaon ug nahilahi nga Bisayang Konsiyerto nga gilangkoban sa inilang mga mag-aawit sa Sugbo.

Ang gikahinamang Bisayang Konsiyerto nga nag-ulohan og Halad, Paghigugma sa Kulturang Bisaya Diha sa Huni, Awit ug Sayaw adto ipahigayon sa halapad ug desenteng wanang sa Mandaue City Cultural and Sports Complex.

Kining maong konsiyertong awit nga Binisaya natigayon pinaagi usab sa hugtanong pagpaluyo nila ni Mayor Thadeo Ouano ug iyang anak nga si Thadeo Jovito Jonkie Ouano sa dakbayan sa Mandaue.

Nunot niini napulo ka inilang mga Sugboanong mag-aawit nga may agi na sa natad sa musika ang mopabati sa ilang piniling mga awit Binisaya nga ubos sa direksiyon ni Maestro Doy Montana ang inilang composer, arranger ug conductor sa Sugbo.

Live on stage ug full orchestra ang moduyog sa napulo ka mga mag-aawit nga gilangkoban ning mosunod … Dr. Warfe Engracia, Mario Jadraque, Chit Ortiz, Armistice Abayan, Baby Condeno, Sam Costanilla, Dr. Bernard Elvis Pino ug ang tulo ka batan-ong masilakong mag-aawit karon sa Sugbo nga sila si Edison Monternel, Lady Michelle Arizabal ug Thea Domingo.