Mabulukong kinabuhi ni DJ Raymund

Sungog ug bugal-bugal gikan sa mga kaubanan sa tunghaan kaniadto ang iyang maangkon matag buka sa iyang baba sa pagbatbat og mga pulong susama sa mga gihangop nga mga disc jockeys. Apan kining tanan wala gayud niya panumbalinga. Gani, padayon siyang nagbansay-bansay ug nagtubo uban sa iyang pangandoy nga usa ka adlaw, siya na usab ang paminawon sa kahanginan sama sa iyang igsuon nga idolo usab niya sa maong industriya.

Si John Paul Basan, lumad nga taga-Sugbo, natawo niadtong Hulyo 3 tuig 1979. Kinamanghuran sa upat ka managsuon, siya namatngon og buot nga tanan niyang panginahanglan sa kinabuhi mahatag sa iyang pamilya tungod sa ilang negosyo kaniadto nga janitorial service.

Siya ang matawag nga blacksheep sa pamilya niadtong panahona kay human siya natugsaw sa nagkadaiyang mga bisyo sama sa inom, barkada ug pagwaldas-waldas sa dihang nagtungha pa siya sa kolehiyo sa kursong BS Psychology. Apan miabot ang panahon nga ang ilang negosyo nahagba. Bisan man tuod og sakit para kaniya, mapasalamaton usab si John Paul sa Ginoo sa maong panghitabo. Iya kining giisip nga eye opener para mag-usab sa iyang mga dili maayo'ng gibuhat ug makaamgo nga wala'y kasiguruan ang tanang butang nga anaa kanimo karon magpabilin. Katumanan sa pangandoy

Tuig 2003, napadpad didto sa Iligan si John Paul, aron lamang mahuwasan ug malimtan ang kasakit nga iyang nahiaguman human siya talikdi sa babaye nga iyang gihigugma sulod sa lima ka tuig. Apan sama sa panultihon, "In every storm, there's a rainbow behind," daw aksidente ang tanan, nga ang dugay na niyang pangandoy nga mahisulod sa kalibutan sa radyo, iya na gayud nakab-ot, inabagan usab sa iyang maguwang nga labing naila isip DJ Jo Twist

didto sa Iligan. Una siyang naila sa kahanginan isip DJ Ace sa I FM Iligan niadto. Ang seryoso'ng tingog nga mabati sa kahanginan sa Iligan nahimo'ng kiat ug bugal-bugalon sa dihang naglanog-lanog na sa kahanginan sa Sugbo sa istasyonan'g 93.9 I FM Pwede!

"Maoy akong ganahan diri, dako kaayo ang diversion. I see to it nga I'm ready 'coz inig lingkod nako, as Raymund, lain na pud nga personality," pakig-jamming ni DJ Raymund sa Banat Hugyaw. Tuod man, dako gayud ang kalainan sa personalidad nga atong madunggan sa kahanginan ug sa tinuod nga John Paul. Sagad man natong mabati nga siya bugal-bugalon, apan sa tinuod lang, siya manggiuwawon, nature lover ug moody nga pagkatawo pero natural na usab kaniya ang may pagka-bugal-bugalon. Moody siya tungod sa kadaghan sa iyang mga huna-hunaon nga mga problema. Apan disiplinado gayud siya sa oras. Kung aduna may kinahanglan buhaton, iya gyud kining humanon bisan makulang pa sa tulog.

Isip usa ka DJ, miagi usab siya og mga kalisod ug mga sitwasyon diin, dili lang siya, bisan kinsa man malingaw usab. Samtang ang labing kataw-anan ug dili gayud niya makalimtan nga panghitabo mao ang pagbikog sa iyang kamot sa dihang on-board siya sa Iligan kay nasayop siya sa pagpatukar sa usa ka kanta. "Nanggahi gyud ko. Wala nako kabaw sa akong buhaton. Since nagahi ko, akong kauban nga DJ nala'y nipawong sa mic," dugang jamming ni DJ Raymund.

Daghang inspirasyon

Sa pagkakaron, gawas sa iyang pagka-DJ, siya usab ang nangulo sa ilang bag-ong janitorial service agency nga inanay nang milambo. Duha na usab siya katuig nga independent sa iyang pamilya. Gani, aduna na siya'y kaugalingon nga balay. Kining tanan niyang kalampusan, para kang DJ Raymund, dili niya makab-ot kung wala ang iyang pamilya ug ang bag-ong minahal nga nagsilbing inspirasyon kaniya. Matud pa niya, dili gyud ka mabuhi kung wala ang imong pamilya kay dako kaayo ang factor sa pamilya sa imong personalidad. Dugang pa niana ang iyang tulo na katuig nga uyab, usa usab ka DJ sa Iligan kaniadto, nga iya na usab giisip nga ang babaye nga gitakda sa kahigayonan alang kaniya.

Tuod man, ang iyang mga suking tigpaminaw midugang usab sa iyang kakugi sa trabaho. Mapasalamaton gayud si DJ Raymund sa mga midayeg sa iyang talento. "For me, radio is showbusiness ug ang mga listeners ang mibuhi namo. Flattering ug ma-inspire ko kung makadungog ko'g nindot nga komento. If daghan magpa-greet, meaning daghan maminaw. So, nindot diay ka nga DJ. Importante gyud kaayo sila kay wala ko diri kung dili pa tungod nila.

Sa kinatibuk-an, kini ang mensahe ni DJ Raymund alang sa tanan: "Hope they stay stuck and support I FM always. We'll try our very best to entertain you better. For aspiring disc jockeys, be the best as you can be. Just trust and believe in yourself. Diri sa kalibutan, wala'y dili kaya. Ana gyud na, before you reach the goal, agi gyud ka'g sacrifices. Read, read and read. Practice sad gyud. Some people say, disc jockeying is a job. Others would say it is a passion. And I do believe in that. Being a DJ is truly a passion."