Nagkaduol nga paghukom

Upat na lang ka adlaw ug ipahigayon na gayud ang highlight sa kulbahinam nga bangga sa kaanyag sa tibuok kalibutan, ang Miss World 2006 karong umaabot Septiyembre 30 ning tuiga.

Ang maong kompetisyon ipasundayag nga 'live' sa nagkalain-laing 'networks' o telebisyon sa mga kanasuran nga pagasaksihan sa duha ka bilyones ka mga 'televiewers o audience' sa tibuok kalibutan. Gani preparado na ang tanang mga kandidata sa tibuok kalibutan sa ilang gipahigayong 'rehearsals' ug mga aktibidades alang sa umaabot nga finals night.

Ang Miss World 2006 Miss Talent gipahigayon atong unang semana didto sa Wroclaw, Warsaw, Poland nga gipangulohan ni Miss World 2005 Unnur Birna, Chairman ug President Julia Morley, International musical director Mike Dixon ug 'renowned choreographer' Donna Derby. Ang mga kandidata sa tibuok kalibutan mipasundayag sa ilang mga nagkalain-laing talent atubangan sa liboan ka mga tawo sa Warsaw, Poland. Ang palarang nahimong Miss Talent mao si Miss Northern Ireland nga mipasundayag sa iyang pagkanta og 'Irish tune' nga nag-ulohan og 'She moves through the fair'. Gisundan kini ni Miss Italy sa iyang 'gymnastics', Miss Zimbabwe ang mitungtong sa ikatulong dapit sa iyang kantang tradisyonal African click song, si Miss Estonia mitungtong sa ika-upat nga dapit ug mipasundayag og 'modern ballet' ug ang ika-limang dapit mao si Miss Mongolia nga takus sab nga mipasundayag sab sa iyang 'traditional dance'.

Si Miss Northern Ireland ang mipahiluna sa ika-tulong 'fast-tract' ug deretsong mahimong 'semi-finalist' ug usa sa nahimutang sa 'Top 16' ug may kahigayonan ug purohang makaangkon sa maong titulo karong umaabot final sa Septiyembre 30 ning tuiga.

Gipahigayon sab pagka-sunod adlaw ang 'special talent show' alang sa nationwide festival sa mga music talents pinaagi sa ilang mga performance atubangan sa mga tawo sa Poland. Unom ka mga kandidata ang gitagaan og oportunidad sa pagpasundayag sa ilang abilidad sa maong show atubangan sa liboan ka mga tawo sa Warsaw, Poland nga sila si Miss World Miss talent Miss Northern Ireland nga mipasundayag sa iyang kantang Irish song, Miss England nga mipasundayag pod sa iyang 'upbeat version' nga nag-ulohan og 'Since you've been gone'. Miss Denmark ug Miss Kazakhstan sa ilang 'popular tune'. Mipasundayag pud sa ilang 'traditional dance acts' mao sila si Miss India ug Miss Mongolia.

Ang ika-upat o' katapusang 'fast-track events' sa Miss World 2006 mao ang 'Beauty with a purpose' nga gitagaan og kahigayonan ang mga kandidata sa tibuok kalibutan sa pagpakita og pagsuporta pinaagi sa pag-raise og funds para sa mga 'charitable institutions'.

Samtang atong balikan ang miaging semana. Gipahigayon na ang duha ka 'fast-track events' nga mao ang Miss World Miss Beachwear nga naangkon ni Miss Venezuela ug ang Miss Sports mao si Miss Canada. Ug sa umaabot nga 'finals night', duha ka kandidata ang mapili kada continental zone pinaagi sa pagpili sa mga hurado ug 'Global SMS votes' sa tibuok kalibutan.

Ang gipahigayong 'Global SMS Voting' sa maong indigay magpadayon hangtod sa Septiyembre 30, walo ka oras usa pa magsugod ang kompetisyon. Busa tabangan nato ang atong pambato nga si Miss Philippines Anna Maris Igpit pinaagi sa pag-text og 'MW112 to 2929'. Hinumdumi, kadaugan ni Anna, kadaugan sa nasud nga Pilipinhon!