Senador Bong, nakadlawnan

Kadlawon na kagahapon nahuman ang birthday party ni Senator Bong Revilla didto sa Heritage Hotel tungod kay nalingaw og maayo ang mga bisita sa gipahigayon nila nga instant videoke session

Pwes ang tsika ni Manay Lolit Solis mao nga miuna siya og pauli tungod kay nakasabot na siyang daan nga madugay og human ang maong party sanglit pwerteng daghang bisita matud pa, kasagaran dili mga taga showbiz.

Ang labing una nga miabot sa party mao si Rudy Fernandez nga gikan pa sa badminton tournament niini sa gipahiyaon nga Star Olympics.

Gani ang tsika sa beteranang kolumnista sa Pangmasa mao nga nag-shorts pa si Rudy pag-abot niya sa hotel ug midiretso sa lawak sa senador aron didto naligo ug nag-ilis.

Early birds usab sa sila si Mother Lily Monteverde, Kitchie Benedicto, ug ang magsuong Malou ug Charo Santos ug of course ang pamilya ni Bong.

Si Lani maoy nangunay gayud pagpapirma sa mga bisita sa guest book aron masiguro nga nalista tanan sa ingon makaapil sa gihimong raffle draw pagsugod na sa party.

Ug tungod kay sayo mipauli si Manay Lolit, wala na niya maabti pa ang iyang "alaga" nga si Yasmien Kurdi nga midiretso sa hotel gikan dinhi sa Sugbu alang sa gihimong Starstruck audition.

Matud ni Manay nga gipaningkamutan gayud ni Yasmien nga makaapil tungod kay sama ra sila og usa ka pamilya sa senador sanglit kauban sila sa sitcom nga Hocos Pocus sa GMA-7.

Nakit-an usab ni Manay Lolit didto sa party ang anak ni Jolo Revilla nga pwerteng liwata sa naulahi. Dugang tsika ni Manay Lolit mao nga "Hindi puwedeng i-deny na anak ni Jolo ang bagets na parang umirap nang makita ako.Tinuruan kaya siya ng kanyang pasaway na lola? Hindi si Lani ang tinutukoy ko 'noh!"

Nasayran nga 40th birthday na kadto ni Bong apan matud ni Manay Lolit labihan gihapon gayud ka bata tan-awon sa senador labi na karon nga medyo naporma na og maayo ang lawas niini gumikan sa pagsigi og badminton.

Midnight show alang ni Rachelle ug Christian

Sa edad nga 20, giuwan og daghang grasya si Rachelle Ann Go. Duna siyay duha ka hit albums, hit singles, music awards ug malipayon nga lovelife.

Busa usa ka selebrasyon nga gigasa kaniya sa iyang home studio, Viva Entertainment last August 31 sa Virgin Café. Lakip sa mga mitambong mao ang iyang manager nga si Veronique del Rosario-Corpus sa Viva Artists Agency ug ang iyang uyab nga si Christian Bautista.

Gawas nga certified singing champion si Rachelle, in-demand usab siya isip endorser sama sa Bench (diin kauban niya si Christian) ug uban pang leading products.