Ila ilaha si Andrie B

Take note, mga manash, nga ang inyong nabasa sa taytol niining article, "Ila ilaha si Andrie B" ug ayaw saypa sa pagbasa kay, dili siya si Andrew E kon dili, Andrie B. Ang tinuod gyod niyang ngalan mao si Andrie Badayos, pero dili sad kono siya paryente ni Wennie Badayos ug matud niya, dili gani sad kono sila managhigala. Dugay gani siyang nahinumdum kon kinsa kini si Wennie Badayos kun wa pa siya pahinumdumi sa news director sa Cebu Catholic Television Network -CCTN-Channel 47 nga si Arnel Dada, nga si Wennie Badayos mao ang pangulo sa usa ka militanteng grupo.

Kinsa kini si Andrie Badayos? Una nako siyang nakit-an didto sa Echo Tech Center niadtong Pebrero, pagsulod nako sa "Balay Ni Tatay" ang pag-apil nako sa gipahigayong tulo ka adlaw nga stay-in Catholic Life In The Spirit Seminar diin, admitido gyod ko nga bisan sa maong seminar, dili gyod unta madani ang usa ka gay sa usa ka ambongang lalaki, nadani gyod ang akong pagtagad kaniya, tungod sa iyang kaambongan pero, gipaninguha gyod nako ang pagtutok sa akong pagtagad ngadto sa seminar proper diin, makapahinuklog pero makalingaw kaayo ang nagkalain laing mga speakers.

Dili usa sa mga speakers si Andrie ug dili usab siya usa sa mga seminarians kun dili, didto siya isip usa sa mga major assistants or serving batch. Gani, siya gyod maoy main server sa mga misa ug sa mga kalihokang spiritual. Gani, nasayop pa gani ko sa pagtoo nga siya usa ka pari, usa sa dakong hinungdan nganong dili ko gustong makahunahunag tawhanong mga tinguha ngadto kaniya. Alang kanako, usa siya ka balaan nga pagka tawo labi na kun mosimba ko sa mga misa sa CCTN diha sa Cardinal Rosales cor. Cabantan, kay kapin kon kulang, siya gyod ang main server [makita sa television ang misa matag alas 12:00 sa udto], bisan pa luyo sa kamatuoran, nga artista usab siya sa mga TV series sa CCTN sama sa "Dear Tatay" ug sa umaabot nga "Langit ug Yuta."

Matud pa ni Bro. Allan Abelgas colorful usab ang kinabuhi ni Andrie sa wa pa kini mosulod sa Oasis of Love, pero mihangyo si Andrie nga dili lang ibutyag sa publiko pinaagi sa media, "puede ba, ako na lang na?" mihangyo si Andrie.