Wala'y malas sa KDB

(Suroy sa www.bisdakzoundz.blogspot.com)

Nahilakip sila sa ikaduhang hugpong sa mga Bisdak rockers nga giabagan sa 93.1 Smash FM sa ilang tuyo nga madunggan sa kahanginan ang ilang mga musikanhong mugna, ug karon nga napasupot na ang hugyaw nilang kantang "Estong" naningkamot pa nga malikayan na ang mga demalas nga daw mihulga sa ilang pagpadayon sa pagpangita og kalampusan sa ilang mga tingusbawan.

"Wa'y malas sa KDB," matud pa ni Regene "Ejing" Vilvestre, ang 21 anyos nga gitarista sa pundok nga taga dakbayan sa Lapu-Lapu. Ang KDB matud pa niya acronym sa "Koolerah and the Digital Buchitoongs".

Sulod sa taud-taod nga panahon nahimo nilang catchphrase ang "wa'y malas aning grupoha" tungod kay mata'g hana nila og record ug ingon man pagtukar, duna gyu'y mga kakulian nga ilang masugatan. Sama na lang pananglit sa ilang pag-adto sa recording studio, takdo sad nga nanghipos na ang assistant sa maong studio kay manglimpyo. Sa pamasin nga mobalik pa ang mo-mix sa kanta, nag-atang sila aron ipadayon ang nabulilyasong skedyul sa pag-record. Apan, kuli ang tanang paghuwat. Nausban pa gyud ang pagkapalpak sa mga plano sa dihang gidapit na unta sila nga motukar alang sa acquaintance party sa Engineering department sa University of Cebu, apan mismong ang taga-sound system ang nireklamo nga saba ang mga rockista.

"Salamat na lang nausab na ang dagan sa panahon kay dili na kaayo mi tantong demalas ron kay okay na ang dagan sa among pagpanukar unlike sa among previous gig nga dili mo-support ang taga-sound system kay gi-judge dayon mi nga saba paminawon," paghinumdum pa sa pundok nga gisundan og panghupaw ang ilang gibuhiang agik-ik.

Dili pa lang gyud dugay, ang KDB nakatukar kauban ang Republika ug Indephums isip paglingaw sa moabot usa ka gatos ka mga sakop sa University of San Carlos-JPIA acquaintance party diha sa Tambuli Beach Resort. Ug usab niadtong Biyernes atol sa "Bisdak Rakrakan" sa Handuraw Events Café kauban gihapon ang Republika ug Indephums, lakip na ang Mantequilla, Aggressive Audio, What's The Frequency ug Gangrene.

Ang KDB mipalanog sa ilang makalingaw, makapagitik ug makapahinuklog nga "Estong": "Hayag ang buwan/ug dili ngitngit ang dalan/ngano bang mahadlok ka man/nga parehas man tang talawan/parehas tang kusog managan/wa ka ba'y nadunggan/wa ka ba'y nasabtan/bisan og gamay lang/naglabing kahadlok/nanubra ang butbot/pangutan-on di ba isog/puti diay'g it**g/sukmati di muangkon/sobra ka bakakon/Estong butboton/talawan di moangkon/Estong butboton/masuko og sungogon/Estong butboton/talawan ra ba gyud intawon."

"Maong makalingaw ni nga kanta kay maka-relate man hapit tanan maminaw because there is an Estong in everyone of us," matud pa sa 23-anyos nga vocalist nga si Ronald Fernandez sa dihang nagpasundayag sila sa Handuraw.

Ang KDB gilangkuban usab nilang Archel Ian Arriesgado, usa ka residente sa barangay Sangi ug nag-major og drafting diha sa CSCST, ug ingun man ni Rey "Reguns" Godinez sa drums, 23 anyos nga tinun-an sa Aircraft Maintenance Technology sa PHILSCA nga ana-a usab mahimutang sa Sangi sulod sa Mactan Benito Ebuen Air Base.

KDB gihapon ang nagpaluyong tingog sa "Small World" nga nag-asimilar og mga linyang romantiko isip pagpalanog sa gitawag og sentimentality sa KDB. "Nakahinumdum ka pa ba/kadtong nagkuyog tang duha/nanglakaw sa eskina/atong giapas si Jessa/akong gisulti ang tanan/nga gibati ko kanimo/apan niingon ka "pasensya na gihigugma ko siya"/Akong gidawat ang tanan/bisan sakit sa akong dughan/magpaabot nga malooy ka/ning kabos nga nahigugma kanimo…"

Sa dihang ako silang gikulit-kulit kon unsa gyud ang buot ipasabot sa Buchitoongs sila nagkanayon: "Wala lang. Reflection lang na's pagka-cool ug pagka-sipat sa mga taga KDB. Play-up lang sa mga words. Happy lang gihapon paminawon maskin nagkalisud-lisud ug nagkamalas-malas."

Apan sa gikaingon ko na sa unahan, tsapter na ang maong demalas nga ilang natagamtaman sa ilang paningkamot nga mahiapil sa hugpong sa mga Bisdak nga manunukar, tungod kay nakapasundayag na sila alang sa Orig All Star event sa Handuraw nga mahitabo na matag Martes sa gabii. Ang maong kalambuan daw sa nakaibot og dakong tunok sa ilang mga tagsa-tagsa ka dughan tungod kay dili lalim ang ilang gilutsan nga daw mata sa dagom sa dihang gisala pa ang mga talento nga patukaron ni Zarah Smith, ang tagdumala sa gitawag og artists' haven, alang sa Orig All Star.