Ang saad ni Sir Dodong

Pila ka adlaw sa wa pa mo- text nako ang akong editor dinhi sa Banat News nga nagpahibawo nako nga dunay ipahigayong Thanksgiving Lunch didto sa usa sa mga function rooms sa Casino Espanol, nag-text nako si Dulce [samtang kauban ko nilang June Philip Tar, Pakol, Ramil Maga, Don Enrique Borromeo, Cherry Halang ug uban pa nga nag-shooting sa Barangay Tapilon sa lungsod sa Daan Bantayan] nga misugilon nga gi-contact siya sa secretary ni Sir Dodong Gullas, kay modawat usab siya'g award gikan sa Philippine Star-The Freeman -Banat News isip Outstanding Cebuana in the field of music kauban sila si Pilita Corrales ug Max Surban. Dungan nila, hatagan pod og pasidungog ang mga Sugboanong mga composers. Kini tanan gitino ni Sir Dodong mismo niadtong miduol siya nako atol sa nahisgutang thanksgiving lunch. Busa wala pa gani ko makakaon, mi-text dayon ko ni Dulce aron ibalita niya ang among giistoryahan ni Sir Dodong nga gisibya pod niya sa dihang gipangayoan siyag mga pamahayag sa emcee sa maong okasyon nga si Joebert Ocao, kauban namo sa The Freeman. Mibawos si Dulce pag-text ug matod niya, dako ang pagsalig niya nga mahinayon, kay wa pa kono mahitabo nga misaad si Sir Dodong unya dili tumanon. Gawas pa, gikatakda na ang awarding sa umaabot nga Pebrero sa sunod tuig.