Jimvoy Dionson: Mentor sa D'Kazins

Kinamanghoran karon sa tanang bandang Bisdak ang "D'Kazins" nga gilangkoban sa mga maanyag nga mga mag-agaw nga taga Canjulao, dakbayan sa Lapu-Lapu nga silang Mary Adrean de la Cruz (drummer), ang managkaluhang gitarista nga silang Whenvy Lyn Noel sa lead ug Whenvy Jean Noel sa bass; ang nag-inusarang lalaki sa keyboards nga si Jogen de la Cruz, ug ang vocalist nga si Jhelsea Maine Flores nga daw gamitoy nga bersyon ni Sampagita kon binuakay na sa paningog sa pagka-rockista ang pagahisgutan.

Tungod sa paningkamot ni James "Jimvoy" Taboada Dionson, ang keybordista sa Bisrock band "Makadawa" natukod ang D'Kazins sa nakalabay'ng tuig ug gani nanganaw-kanaw na usab sa 93.1 Smash FM ang ilang kantang "Naunsa Na?" nga usa ka atake batok sa daw di na masabot nga sistema ning atong katilingban, mga kabatan-unang badlongon nga mas pilion pang maglunang sa gitawag og "gangstah paradise" inay maningkamot motampo ug mga maayong buhat, ug mga tinun-ang nanagyampungad sa Internetan ug bilyaran inay adto sa ilang mga lawak saringan.

Sukad pa sa tuig 1997 usa na ka magtutudlo si Sir Jimvoy sa A. Salonga School of Music dinha sa SM City-Cebu diin ang iyang mga leksyon may kalabutan sa oido sa piano, usab sa keyboards, guitar, bass, drums ug voice. Ang klase mahitabo gikan sa mga ala-una sa hapon ngadto sa alas-nuybe sa gabii Lunes hangtod Biyernes.

Lumad nga taga Tres de Abril, karon si Sir Jimvoy nanimuyo na's may Escario dapit ning dakbayan. Bisan pa man og nakahuman siya pagtoon sa kursong Bachelor of Science in Business Administration major in Accounting sa University of the Visayas, mas gipili ni Sir Jimvoy ang pagpalipang sa katakos sa natad sa musika tungod kay nakita niya ang pagsulbong sa bitoon sa mga bata nga iyang gipandongan sa iyang paggiya kon "mentoring" diha sa A. Salonga.

Sa paningkamot ni Sir Jimvoy, ang manag-agaw kansang mga pangedaron ana-a pa lamang sa diyes anyos ngadto sa katorse anyos, nakatukod gayud sa bandang D'Kazins ug naka-record na og sugod. Gi-sumite ang kantang "Naunsa Na?" nga gisuwat ug gipahaum ni Sir Jimvoy sa Smash. Karon nakakita na kini og luna sa kahanginan ug may pipila na usab nga mohangyo nga patukaron kini atol sa tulumanong "YourVoice, YourChoice Tingog Kabataan", Martes ug Huwebes 9:30 am hangtod 11:30 am.

Sugod niadtong Hunyo 11, wala na'y pu-as ang mga gigs nga nakalinyada karon alang sa bandang D'Kazins nga gi-"groom" pag-ayo ni Sir Jimvoy aron mosamot pa kahumot kining pundoka ngadto sa mahiligon kaayo sa mga kantang Binisaya. Sila ang gitagnang mamunglay og mga pagtagad gikan sa mga kabatan-unan nga ilang mga katalirongan.

Tungod kang Sir Jimvoy, nagmalampuson ang gipahigayong linawas nga pasundayag sa D'Kazins alang sa "One From the Heart" event diha sa SM Atrium Plaza pinaluyohan sa dili matabas-tabas nga suporta sa A. Salonga School of Music diin ang lima ka mga batan-on nagtuon og voice lessons ug pagtukar sa mga nagkadaiyang instrumento.

Niadtong Pebrero 18, nalangkat sa pundok ang kadungganan isip Grand Champion sa gipahigayong band explosion nga gipaluyohan sa San Roque Child Development School of Liloan. Ang D'Kazins maoy nigawas nga mananaug nga mitumba sa laing 11 ka mga banda. Sila mao ang kinabataan sa tanang nangapil.

Sa gipahigayong Ladies Rock Night (A Bisrock Event: One Nite Stand 2) sa Wuzzup RestoBar diha's Escario street niadtong Hulyo, ni-jam ang D'Kazins sa ilang mentor nga mga kuya nga mga sakop sa "Makadawa" alang sa dugang pa'ng exposure, kauban ang lain pang mga bandang Bisrock sama sa Ossified, Timeslot ug Indephums.

Ug niadtong nakalabay'ng buwan, "gipanglow-batt-low-battan" ang uban pang mga bandang Bisrock atol sa Bisrockers Nite diha sa Handuraw Events Café sa dihang inay mga kabahin lang sila's mga nanan-aw, gi-request sila'ng motukar. Ang hangyo nga usa ka kanta nahimong tulo ug nahugyaw ang mga nanan-aw sa ka-payter sa mga batan-on.

Mapasalamaton dili lamang ang lima ka mga tinun-an, kundili lakip na ang ilang mga ginikanan, mga kaparyentehan ug mga kahigalaan sa kakugi ug pasensya ni Sir Jimvoy sa padayong pag-motivate sa D'Kazins nga hatagan ug katumanan ang ilang damgo nga maka-record ug kanta ug makatukar sa nagkalain-laing entertainment bars dinhi sa dakbayan alang sa pagpalambo sa ilang mga talento.

Sa paggiya ni Sir Jimvoy, dili na halayo ang posibilidad nga usa ka konsyerto diin ang D'Kazins mao ang main act ang mahitabo sa nataran sa Bisrock nga komunidad.