Mga tinaguan ni Kaye nabuyangyang

Gikagubtan na ang sexy pictures sa kanhi young star nga si Kaye Abad kinsa maoy cover karong buwana sa Maxim men's magazine, ang unang franchise title sa ABS-CBN Publishing Inc.

Tsika sa PangMasa labihan ka sexy ni Kaye nga matud pa milutaw gayud ang iyang natural beauty sa iyang sexy poses.

Nahimout usab ang mga tsikadora sa PangMasa sa istorya ni Kaye kalabot sa iyang pagpananghid ngadto sa iyang mga ginikanan may kalambigitan sa nahisgutang sexy cover alang sa usa ka men's magazine.

Matud ni Kaye, ang iyang mommy nanghunaw nang daan ug gipasa siya ngadto sa iyang daddy aron adto papananghiron.

Pwes sa dihang miatubang na siya sa iyang daddy nga miingon niya, "matanda ka na naman. Ano ba ang isusuot mo, panty at bra?"

Niadtong panahona, ang layout pa lamang alang sa cover maoy nakita sa iyang daddy ug wala pa niini masud-ong ang iyang 10-page pictorial nga giingon sa art director.

Matud ni Kaye walay giusab o walay giretoke sa iyang lawas, gawas lang sa color aron mohaom sa mga mugna sa production.

Matud niya malipayon ang iyang boyfriend of four years nga si Chito Miranda, bokalista sa Parokya ni Edgar, sa nahimong resulta sa iyang pictorial.

Gipahimug-atan ni Kaye nga dili ang intriga nga nagminyo na siya ug duna nay anak ang rason nganong midesisyon siya nga mag-pasexy.

Gikataw-an ni Kaye ang maong isyu gumikan kay matud pa niya kon naminyo pa siya nagpunay unta siya og kugos og bata matag lakaw niya. Gawas pa wala siya'y stretch marks.

Matud niya natayming lang gyud nga mipahuway siya sulod sa usa ka tuig human sa "Tabing Ilog" kaniadto diin wala siyay laing gibuhat kondili ang mokaon ug matulog hinungdan nga nanambok siya.

Samtang nasayran sa PangMasa nga ang first boyfriend ni Kaye nga si John Lloyd Cruz maoy mi-react human makita ang Maxim ug wala makapugong ug nangutana gayud sa iyang handler: "si Kaye ba yan?" tungod kay wala kini mag-expect nga buhaton kini sa dalaga.

Matud pa conservative si John Lloyd ug matud pa hangtud karon, sila gihapong barkadaha ang manuroy.

Gani si John Lloyd pa ang mohatod kang Kaye ngadto sa Cavite usahay ug wala kini problema ngadto kang Chito nga matud pa labihan ka but-an,liberal ug masinabtanon.