Taga Toledo nasad?

Karon pa ko makaamgo nga dili sad diay gyud mabintahaan ang mga taga Toledo. Kaniadto god, mora lang ba'g taga Bohol nga yano yanohon lang sa mga tawo pagbiaybiay, pero mga manash! Lahi na ang mga Bol-anon rong mga panahona, gawas nga mag-number one na sila hapit isip tourist attraction, pila na pod ka mga celebrities ang ilang na-produce. Ingon sad ani ang mga taga Toledo, no? Kaniadto ang unang taga Toledo nga nakadapit sa akong mga pagtagad, mao ra intawon ang akong mga paryente sama sa mga Barba [nga sama nakog kaliwat ug mga Aguilar sa Barili ug mga Espinosa nga ang uban gikan sa Masbate, ang uban gikan sa Leyte ug Iloilo], labi na ang pag-umangkon nakong si Aion Espinosa Adlawan nga nag- working student primero sa Gaisano Main nga gihimong dancer nilang Joel Marindoque [sa security department] ug July "Japz" Canete [sa PR department]. Nakuha pod sa akong ig-agaw nga si Miss Gemma Ruiz Espinosa isip working student sa CIT ug karon, hapit na gyod makahuman.

Sa una, kadto lang gayud siya, unya, nahimamat nako si Dennis Barabat sa Gaisano Main gihapon nga nagsige sad og panudlo'g kanta sa mga estudyante sa STI ug sa uban pang tunghaan, producer usab siya og mga concerts para sa iyang mga estudyante.

Unya, nahimamat nako si Anna Fegi nga hangtod ron, dili gyod malimot ni Madam Mila Espina, ang supportive kaayong College Dean sa USJ-R nga hasta si Jimmy Marquez, dili pod malimot.

Unya, dili pa dugay, nahimamat pod nako, laing taga Toledo, si Jay-R Siaboc didto sa Neo-neo Grill sa Juan Luna Avenue (kaniadto San Jose de la Montana). Kauban niya didto ang mga dreamers sa Pinoy Dream Academy, semana sa wala pa mapili ang 20 scholars. Si Jay R sa nasayran na nato usa sa duha ka Sugboanong napili niadtong Agosto 26 diha sa Cebu Provincial Capitol.

Si Jay-R maoy una nakong gikahinabi, kay sa pagpangutana nako'g kinsay taga Cebu, diritso dayon siya'g ingon "Ako..." Giangkon niyang siya'y kamanghuran sa ilang pamilya, pero igo lang siyang nakahuman sa Awihao National High School, kay pobre sila, jeepney driver lang ang iyang amahan, ug edad edaran na. Social worker ang iyang inahan. Gamay'g sweldo, maong nanimpalad siya dinhi's Cebu City, kantakanta hangtod nahimong vocalist sa Scrambled Eggs Band. Nganong Scrambled Eggs? Kay ang mga estudyante sa USC-Talamban, mo-istambay sa Payag Ni Bodoy, way laing order, scrambled eggs. Busa dihang natukod na ang banda, ang waitress maoy nag-suggest sa maong ngalan. Gawas pa nindotan usab sila maminaw niini. Sila'y nagkanta sa nanganaw kanaw na karon sa Smash FM nga bisrock song "Hilot."

Sa laing bahin, si Panky Trinidad, vocalist sa Anino, miangkon nga ang grupong Sakdap nakatabang kaayo niya, kay taga PLDT man ang iyang mommy diin, duha ka myembro sa sikat kaayo kaniadtong Sakdap ang kauban sa naulahi sa trabaho. Giangkon sad niyang pagkahuman niya sa high school, kanta kanta na lang gyo'y iyang giganahan, wa na sa iyang hunahuna ang pag-eskuyla. Matud ni Panky kanta-kanta na gyo'y giatiman nga nakaayo niya karon nga usa na siya ka scholar.

Ang taga Cordova nga si Rachell Borbajo, naka trabaho sa PIO sa Mandaue City hinungdan nga nakaila siya sa mga taga media ug nahimamat ang paryente nga si Councilor Allan Borbajo.