Pag-aninaw sa Miss World 2006

Pormal na nga nagsugod ang Miss World 2006 pinaagi sa Welcome Dinner didto sa Warsaw Poland nga gitambongan sa mga halangdon nga tawo sa maong nasud, mga sikat nga mga artista ug mga dignitaries lakip. Nangulo sa maong kalihukan mao sila si Mrs. Julia Morley, presidente ug tsirman sa maong indigay, Mrs. Kacimierz Marcinkiewicz, mayor sa Warsaw, Poland ug ang reigning Miss World 2005 Unnur Birna sa Iceland. Karong umaabot September 30, ipahigayon na ang "56th Miss World Beauty Pageant."

Nagkanayon si Morley nga 103 ka mga kandidata ug representante sa mga kanasuran sa tibuok kalibutan ang magtigi sa natad sa kaanyag karong bulana. Karong semanaha ang tanang mga kandidata atua na sa Gdynia Poland alang sa "Beachwear Filming" nga mulungtad og lima ka adlaw sanglit didto usab himoon ang taping alang sa "Pls Vote for Me" clips. Adto sa Nadmorski Hotel ipahigayon ang Miss World Beachwear Final ug ang Miss World Talent Show.

Ang pambato sa Pilipinas, ang Boholana apan nagdako sa Sugbu nga si Anna Maris Igpit, atua na didto. Sa katapusan niyang text nga nadawat sa Banat Hugyaw niadtong Sabado sa gabii gikan sa Manager sa Models Association of Cebu, Chicoy Tomol, nagkanayon nga lig-on nga kandidata ang Miss Australia ug Miss Lebanon kay dili gayud basta-basta ang mga dagway niini. Apan subling gipamahayag ni Anna nga ang Ginoo nay mag-igo ug siya igo lang maningkamot kutob sa iyang mahimo. Si Anna nahisakop sa Asia Pacific region nga gilangkoban sa mga representante sa mga kanasuran sa Asya. Siya ang atong paglaum nga maangkon ang labing unang Miss World Crown nga sukad masukad wala gayud mapanag-iya sa Pilipinas. Niadtong 1973, diriyot gayud madughit ni Miss Evangeline Pascual ang maong titulo human siya napiling first runner-up.

Ang sinugdanan

Ang kompetisyon sa Miss World Beauty Pageant nagsugod niadtong tuig 1951 sa pagpasiugda ni Eric Morley, ang Founder ug President sa Miss World Organization. Ang bugtong tumong nila ni Morley mao ang pagtigum og pundo alang sa mga charitable institutions. Siya usab ang kapikas sa kinabuhi ni Julia Morley, ang chairman sa Miss World Organization karon. Si Eric mitaliwan ngadto sa laing kalibutan niadtong tuig 2000.

Ang unang nahimong Miss World sa tuig 1951 mao si Kiki Haakonson, ang representante sa nasud sa Sweden. Nagsugod pagsalida ang Miss World sa telebisyon niadtong tuig 1959 hangtod tuig 1979 pinaagi sa BBC Network. Sa tuig 1980 hangtod sa tuig 1988 ang Thames Television Network na ang mipasalida niini.

Ang labing unang Filipina nga nakakuha og pasidungog sa Miss World mao si Miss Philippines World 1968 Cecilia Amabuyoc, 4th runner-up; gisundan nila ni Onelia Jose, semi-finalist (1971); Eva Reyes, semi-finalist (1972); Evangeline Pascual, 1st runner-up (1973); Sara-Jean Areza, semi-finalist (1982); Sherry Rose Berny, semi-finalist (1986); Ruffa Gutierrez, 2nd runner up (1993); Caroline Sobejano, semi-finalist (1994); Daisy Reyes, Miss Personality (1996); Katherine Manalo, Top 10 finalist (2002); Maria Rafaela Verdadero Yunon, Top 5 finalist (2003); Maria Karla Rabanal Bautista, Top 5 finalist (2004) ug Carlene Aguilar, semi-finalist (2005).