Gitug-an ni Piolo ngadto sa PangMasa nga sa pagkakaron, mas gisinati una nila ni Rica ang usag-usa ug wala siya magdali nga sugton sa dalaga.
Wala usay problema alang kang Piolo ang angga ni Rica nga "babaing bakla," kay matud pa niya sa PangMasa, kung tinuod gyud nimong gimahal ang usa ka tawo imo siyay dawaton bisan unsa pa man siya. Gani miingon si Piolo nga kon aboton siya og kalaay ang mga pasiaw man ni Rica maoy iyang pangitaon. Miingon usab si Piolo nga lain niyang nagustuhan kang Rica mao ang pagkatinuod niini nga tawo.
Nagka-ilhanan og maayo sila si Rica ug Piolo human sila nagkauban og byahe sa 17 cities didto sa Europe kauban ang Mommy sa dalaga, usa ka igsuon ug amiga niini.
Sa mga pangutana kabahin sa pag-rigodon sa mga girlfriends sa mga Hunks, kay kaniadto si Kristine Hermosa maoy girlfriend ni Jericho Rosales, karon si Diether Ocampo na ug karon si Rica uyab kaniadto ni Bernard Palanca nga karon kasamtangang gipanguyaban ni Piolo, miingon siya nga wala gayud niya giplano ang panghitabo.
Giklaro ni Piolo nga kalit lang butho ang iyang pagbati ngadto kang Rica human sila nagkakuyog sa soap opera nga "Sa Piling Mo." Hinuon, nananghid man sad siya daan kang Bernard una niya gipangulitawhan ang dalaga.
Samtang gikataw-an lang ni Piolo ang mga intriga nga dili niya tinuod nga anak si Inigo. Suma pa ni Piolo, 99.96% ang resulta sa DNA test sa bata nga mag-nuwebe anyos na karong September 14.
Sa pagkakaron, ang apelyido na nga Pascual ang gigamit sa iyang anak nga kaniadto Inigo Lazaro kay nagkasinabot na sila sa inahan niini nga gamiton na ang maong apelyido. Para kang Piolo, gasa sa Ginoo ang paggamit sa iyang anak sa iyang apelyido.
Sa laing bahin, sa October pa ang paglarga ni Piolo ug ang ubang cast sa soap nga "Walang Kapalit" ug duha sila ka semana nga mag-taping didto. Half of October, si Piolo makita sa unom ka siyudad para sa iyang US concert tour. November na siya mobalik sa nasud.