Pangandoy ni Mong

Makapaikag sa padayong panikay-sikay ang natagamtamang kalampusan sa ere sa "Nailad (Nanghambog)" nga maoy nakapa-click sa bandang "Flirt" ug karon aduna'y dakong luna sa gitawag og Smash-ing airwaves gumikan sa ilang pagsaway sa usa ka babayeng hambugera, usa ka taras nga dili angayang pasumban - "niadto ko's inyoha nagtan-aw ka'g teevee/nagstorya mong duha/nangilad ka, nanghambog ka/namutbot pa gyud ka..."

Si Armin "Mong" Yaun, 20 anyos, ang lead guitarist sa maong banda mipugnit og kusog sa linyang "libre ang mangarap" sa pangandoy nga mahuman ang ilang giplanong album alang sa paglusad puhon niini kon may igong ikagasto.

Makapahinuklog ang kaagi ni Mong. Mitaliwan ang iyang inahan Hulyo sa nakalabay'ng tuig nga wala man lang gani makita ang katumanan sa iyang paghuman sa kursong Aircraft Maintenance Technology diha sa Philippine State College of Aeronautics sa Mactan Benito Ebuen Air Base, Sangi, dakbayan sa Lapu-Lapu.

Wala na sad madunggi sa iyang Mama Flora ang padayong panganaw-kanaw sa iyang mga komposisyon. Hinuon, ang maong mapait nga kasinatian nakahatag niya'g kaikag nga tagikon ang kantang "Somewhere" taliwala sa pagbangotan. Kini nagkanayon "My friend, I lost my girl/I don't know why she's going away/I send this letter and after all/there's no reply for me/I miss you so much..." nga matawag og usa ka harana alang sa iyang pinalanggang inahan nga matud pa niya "mora'g nawala ang akong direksyon susama'g piso sa dihang nahikawan sa pagpandong sa pako sa himungaan kadtong wala na si mama. Kugihan kaayo to si mama dili gyud unta mi magkalisud og sama niini kon buhi pa siya."

Sa dihang naila-ila nako si Mong niadtong gikahinabi nako ang uban pang mga sakop sa Flirt, diha'y luha nga milugmaw sa iyang mga mata tungod sa gisagubang nga kalisud. Mao man gani nga dali nakong natagik ang ilang kaagi nga kapanalaminan sa ubang mga batan-on nga mga tubig-tubigan aron dili unta nila usikan ang ilang katakos sa mga butang nga walay kapuslanan kay kon si Mong pa ang nagsul-ob sa ilang sapatos, siguradong nakasutoy na unta ang Flirt sa ilang proyektong album nga may giplanong ulohan nga "Scrap and Metals".

Sa nakalabay nang mga artikulo mahitungod sa Flirt, nahisgutan na nako nga interesante kaayo ang maong working title kay repleksyon kini sa mga paningkamot sa pundok nga maka-record sa ilang mga materyales alang sa maong album nga karon wala pay kasiguroan kon kanus-a mahuman kay wala pa'y nisanong sa ilang panawagan nga aduna untay maka-sponsor kon makapaluyo.

Walay kukaulaw nga gipakita ni Mong ang iyang tudlo sa walang kamot ug dayong ingon, "mao ni proof nga sige ko'g panit og bronse para naay ikapatimbang, para naay money kay mga pobre intawon mi nga gusto maka-album."

Ug sa gibuhiang pulong ni Mong, nalaksi ang katig-a sa akong balatian kay nihilab og kalit ang akong galamhan sa realidad nga layo pa gayud nga matuman ang "Scrap and Metals" kay nasayran usab nako nga human sa gidangatan sa inahan ni Mong, nasundan kini sa paghalin sa laing kalibutan sa iyang manghod lalaki gumikan sa sakit nga kanser. Hinungdan kini nga nabulit intawon ang ilang pamilya sa utang tungod sa gisustinir sa gasto sa ospital, pagbilar ug pagpalubong.

Apan bisan pa man niini, gilantaw ni Mong nga sunod tuig malusad ang maong album. Ug nabisbisan ang maong panglantaw sa usa ka buhing pangandoy nga may maluoy ra kanila ug mopaluyo ning maong katuyoan.

Ang maong pangandoy naghatag og kusog nga ang konsepto sa pagbanda dili lamang alang sa mga kwartahan nga mga batan-on, kundili may luna usab ang mga uyamot.

Pangandoy ni Mong nga ang album may duha ka kanta nga himoon sa paaging acoustic. Ang ubang mga materyales manalamin puhon sa mga impluwensya sa ilang kinaham nga mga banda - ang Kamikazee, Incubus, Sandwich, Mayonnaise, Urbandub, Blink182, Typecast ug Eraserheads. Tungod sa maong mga impluwensya, nalabni na sa Flirt ang usa ka pasidungog sa dihang napupo nila ang first runner-up spot sa nahitabong "Jam Ta Bai!" Battle of Bands atol sa kasaulogan sa Lapu-Lapu city fiesta diin gikatigi nila sa binuakay og paningog nga rock ang 21 ka mga gitawag og top bands sa maong dakbayan.