Si Direk Roderick

Mora og kagahapon pa lang gayod ang nakalabay apan pila na diay ka tuig ang milabay dihang gunitan pa ni higalang Lucrecio Bontilao ang kamot sa singko anyos niyang anak nga si Roderick matag apas nila kang Marlene nga iyang asawa nga kanhi talent sa DYCB. Diha pa sa Ybanez Building sa Fuente Osmeña ang DYCB niadtong panahona, 25 na diay ka tuig ang milabay, ug karon, kami na usab ang nagkakauban ni Roderick diha sa mga tolomanon sa Cebu Catholic Television Network -channel 47 diin, siya ang leading man sa action TV drama ni direk Rey Samaco nga nag-ulohann og "Dugong Sagrado"

Apan dili kay artista lang si Roderick Bontilao kay siya man usab ang director sa "Dear Tatay" usa ka tolomanon sa CCTN gihapon diin si Brother Nonito Lim Chua mohatag og tambag sa nagpadala og suwat nga himoan og sugilanon aron mahimong usa ka teleserye nga matapos matag semana. Tungod niini, daghan na usab ang motawag kaniya og Direk Roderick, apan sama usab nila ni Direk Pepe Tariman ug uban pa, dili gusto si Direk Roderick nga tawgon og Direk, kay matud niya, talent ra usab siya. Gusto niyang tawgon lang sa iyang binunyagan, ugaling lang, kay ang angga niya, Direk man, kuha sa iyang ngalan nga Roderick [dili ba?].

Ang "Dugong Sagrado" dili maoy unang TV drama diin si Roderick kon Direk, maoy bida. Siya ang kanunay saligan ni Direk Marcos Navarro Sacol sa mga TV nga sinuwat niini ubos sa ABS-CBN.