'Unravelling' album gilusad

Yeps mga rockista, reggaenista, hiphoppers ug punkista, duha na ka tuig niadtong Agosto 8 ang Handuraw Events Café diha sa Mabolo nga nainila isip usa ka "artists haven" tapukanan/hugopanan/tambayan sa mga independent Bisdak musicmakers, mga visual artists ug mga independent filmmakers.

Handuraw mao ang Sugbuano alang sa "the power to imagine". Ang establisamento miabi-abi sa nagkalandrakas nga mga bisita nga gikan pa sa nagkalain-laing lakat sa panginabuhi - gikan sa mga sakop sa Cebu tri-media, mga kahigalaan, kapamilya, kapuso ug mga kaparyentihan, mga pintor, ug mga banda - parehong nakasulbong na ug ang uban naningkamot pa. Ang mga sakop sa mga bandang mitambong milingi sa Handuraw isip usa ka ganghaan diin sila nanukad alang sa pagkab-ot sa ilang tumong nga madunggan, mamatikdan, ug makamugna og kasikas alang sa pagduso sa gitawag og "loud and proud sound of the Great South".

Niadtong gabhiona nahitabo usab ang usa ka paglusad ni Zarah Smith ug sa iyang banda sa ilang album nga may ulohang "Unravelling". Tuod man, gikutlo ni Zarah ang pipila ka mga tracks sa album aron kahatagan og mas dakong kinabuhi pinaagi sa usa ka linawas nga pasundayag. Ang "Unravelling" mao ang mga tinipong sugilanon sa mga naagian ni Zarah sulod sa kinse ka tuig nga pakigbugno sa walog sa indie musicmaking. Iyang gitagaan og makapanlimbawot sa balhibong rendisyon ang orihinal nga komposisyon sama sa "Love Is All Around", "Existence" and "So-Called Love" nga iyang gipanday kon gimugna kaabag ang iyang igtagsa nga si Gina Pestaño sa Kahayag Café, ang keyboardista sa local reggae nga bandang "Junior Kilat".