Tindahan sa IDK

"I Don't Know." Kini dili tubag sa usa ka pangutana kondili kahulugan sa mga letra nga IDK nga nagrepresentar sa lima ka mga binuhat nga naghugpong aron manimpad sa nagkadako ug nagkakusog na nga Bisrock community sa Sugbu. Check! Aron madali, sila tawga lang og ang IDK band nga gilangkuban nila ni Wilson Magale (drums), Dean Ver Booc (vocals), Mill Sam Millama (lead guitar), Thomas Vincent Laput (rhythm guitar), ug Gilbert Dilan (bass). Ang IDK nahimugso niadtong November 2005 ug ang ilang unang kanta nga nanganawkanaw na karon sa kahanginan pinaagi sa 93.1 Smash FM mao ang 'Tindahan." Pong pang Gilbert ang maong kanta kabahin sa usa ka lalaki nga nakakita og usa ka babaye sa usa ka tindahan, naila-ila ug nahimong higala, apan wala mahimong hinigugma.

Si Magale matud pa maoy nangusog aron mamugna ang IDK. Ug tungod kay silang tanan managhigala man ug kauban sa trabaho diha sa Lapu-Lapu City natigayon ang katumanan sa IDK. " For fun ra man gyud ning banda-banda. Pawagtang sa stress gikan sa work. But if there is a good offer why not?" pong ni Gilbert.

Niadtong Abril ning tuiga, nagpasakop ang IDK sa Zuglu o Zugbuanong Lumad nga unang namugna diha sa dakbayan sa Talisay niadtong December 2005 ubos sa paningkamot ni Bimbo Baliguat. Apan sanglit ang mga sakop sa IDK band kanunay nga busy sanglit kasagaran kanila mga engineers wala pa kaayo silay mga gigs sa pagkakaron. Matud ni Gilbert silang mga sakop ra usab ang naggama sa ilang mga kanta diin ilang gipaningkamotan nga makapagawas na og album karong tuiga. Progressive rock, alternative ug experimental ang paghulagway nila sa matang sa ilang musika.

Karong Sabado sa gabii diha sa 626 Tapsilog sa Humay-humay dakbayan sa Lapu-Lapu mopakita sa ilang abilidad pinaagi sa "The North Invasion" diin maghugop ang nagkadaiyang mga banda gikan sa Norte nga bahin sa Sugbu nga mga sakop usab sa Zuglu. Kauban nilang motukar mao ang Soul Brothers, Hotpress and the Gluespreaders, Terminal Waiting, Aerial Grass Pilot ug Comic Crash Can.

Alang sa dugang kasayuran kalabot sa IDK band bisitaha ang www.myspace.com/idkbando6.