Sukob ikatulo sa box office record

Miabot na kagahapon ang magtiayong Kris Aquino ug James Yap gikan sa ilang bakasyon didto sa Amerika human usab sa world premiere sa Sukob didto sa Los Angeles.

Nasayran ni Manay Cristy Fermin, kolumnista sa PangMasa nga nakapahuway gayud ang duruha og maayo didto sa Amerika tungod kay wala silay gihunahuna nga commitments ug silay tag-iya sa ilang oras.

Gipadayag usab ni Kris ngadto kang Manay Cristy nga feel niya ang iyang pagka-asawa tungod kay siya maoy namalantsa sa mga biste sa basketbolista.

Mibiya nga malipayon sila si Kris ug Claudine kauban ang ilang mga bana tungod kay gidugok og maayo ang pelikulang Sukob ug ning ilang pagbalik mas dako nga kalipay ang ilang gibati.

Kini tungod kay gipahibawo na sila sa Star Cinema nga rank number three na ang Sukob sa mga pelikula nga gigama sa maong movie outfit nga labihan ka dako og kita.

Nag-una pa gihapon sa box office record ang pelikula ni Ai-ai delas Alas nga "Tanging Ina" ug nagsunod ang "Anak" ni Mayor Vilma Santos ug Claudine.

Claudine ug Juday dili suod

Nahibong si Judy Ann Santos nganong giiintriga silang duha ni Claudine Barreto kalabot sa unsay mahimo niyang reaksyon kon si Mrs. Santiago pa ang napiling Best Actress sa bag-o pa lang nahuman nga Gawad Urian diin siya ang presentor.

"Honestly, I'll be happy for her kung siya ang nanalo," pasiuna ni Juday. "Ako kasi, naniniwala ako sa isang award-giving body, na ma-nominate lamang ako, ang laki nang honor sa akin iyon. I believe in the Urian, at kung nanalo si Claudine, she really deserves it at walang dapat maging issue kung ako naman ang nag-present ng award sa kanya. Personally, wala kaming away ni Claudine, we're not close but we're friends."

Si Juday nakuhaan og reaksyon sa PangMasa atol sa premiere showing sa digital film nga "Umaaraw Umuulan" sa SM Megamall ug isalida na karong adlawa. Karong adlawa usab gikatakda nga molupad sila ni Ryan Agoncillo for a series of shows sa States, diin malipayon si Ryan, tungod kay malampuson ang nahisgutang movie nga bida silang duha ni Precious Lara Quigaman.

Matud pa nga dunay special participation si Judai nga siguradong ikahimuot sa mga Judai-Ryan fans tungod kay nindot pagkakuha ang ilang kissing scenes.

Samtang nahuman na usab og gama ang duruha sa "Kasal, Kasali, Kasalo" nga entry sa Star Cinema alang sa Metro Manila Film Festival 2006. Gihuman usab ni Ryan ang taping sa "Philippine Idol" sa ABC-5 tungod kay three weeks silang magpabilin sa States, alang sa ilang shows didto sa Los Angeles ug Jacksonville ingon man usab didto sa New Jersey ug Chicago.

Gikinahanglang mahibalik si Ryan sa September 1 tungod kay sugod sa September 2, live na nga makita ang "Philippine Idol." Ang teleserye usab ni Juday nga "Sa Piling Mo" kauban si Piolo Pascual, mahuman na sa unang semana sa September. Ang ipuli unya niini, soap opera na nila ni Judai ug Ryan.