Hampak sa Tsunami sa 95.5 Star FM

Sukwahi sa kadaghanan’g mga disc jockey o DJ, wala gayud damha ni Ernesto Yap Jr. nga mas naila sa kahanginan isip "Louie Tsunami," nga masulod siya sa maong karera. Gani pagpangoma man ang natapos niya nga kurso didto sa iyang yutang natawhan sa Dipolog City. Pinansyal nga panginahanglanon maoy nagtukmod niya aron masulod siya sa kalibutan sa mga DJ.

"First of all, music lover gyud ko. But then, nagtrabaho ko ani, sa radio, not basically kay ganahan ko mag-DJ but because of financial needs. And then, naa say time sa akong kinabuhi nga nag-separate ang akong mama ug papa, so wala nami stable nga income. Mao ‘tong sa tanan nako’ng giaplayan, sad for the network ila kong gikuha, ha ha ha. . . .bitaw, luckily I was assigned as a DJ sa Dipolog," nagkatawang asuy ni Louie Tsunami dihang nakig-"jamming" siya sa Banat Hugyaw.

Tuig 2001 dihang una siya nga nadungog sa kahanginan isip si "Louie Gray" sa Star FM Dipolog. Tungod sa iyang gipakita nga dedikasyon sa trabaho wala magdugay og natudlo siya nga station manager, una pa siya giibot gikan sa Dipolog ug gidestino didto sa Tacloban City. Suma pa ni "Louie Tsunami" naglisud siya sa sinugdanan tungod kay gawas nga wala siya’y mga kaila didto, dili pa gayud siya makamao mo waray-waray.

Sa tuig 2004, giibot na usab siya gikan sa Tacloban ug gibalhin dinhi sa Sugbu. " Greatest challenge nako is pag-transfer nako diri sa Cebu which is ako ang nag-manage sa station wherein ako ang pinakabata and then dako pa gyud nga area. Nag-start ko as manager when I was 23. Lisod pa ang pag-earn sa respect sa mga under nako ‘coz maguwang pa sila nako. But karon, okey na," pagtino niya ngadto sa Banat Hugyaw.

Luyo sa kalisdanan nga iyang nasinati, mipatigbabaw ang iyang kadasig nga molingaw sa mga tigpaminaw- kinsa usa sa iyang mga inspirasyon aron mopadayon sa iyang trabaho bisan pa man sa dili kapugngan usab nga mga kapakyasan. "Sa mga feedbacks sa mga listeners, ma-inspire usab ko nga everytime I go on-air, I must see to it nga, perfect ang akong program although masayop sad ta kay tawo ra gud ta. As they say, experience is the best teacher. Pasalamat sad ko sa mga negative feedbacks nga ilang ihatag kay at least ma-corrected ko sa akong mga sayop," pong pa ni Louie Tsunami.

"Basically, sa akoa karon, more on management man gud ko. Although everytime nga mo on-board ko, I’m a DJ gyud. I have that personality nga once mo off-board ko, balik ko sa akong pagka-manager wherein I oversee all the operations. Wala gyud ko’y regular nga program nga akong I-handle. As a manager, kung kinsa nga DJ ang mag-day-off, ako ang mo-fill in. Kapoy but well, if you love your job, dili na siya bug-at," padayag pa ni Louie Tsunami.

Tinood nga dili tiaw ang iyang responsibilidad, sama nga dili usab tiaw ang iyang naabot sanglit sa pangidaron nga 26 anyos, station manager na ang iyang ranggo. Ang iyang pamilya suma pa ni Louie Tsunami maoy labing dako nga rason nga pursigido siya sa iyang gibuhat.

Sama sa naila sa kadaghanan, si Louie Tsunami o si Ernesto sa tinuod nga kinabuhi walay kalainan, siya "bugal-bugalon" o malipayon nga tawo. Bisan man tuod nalayo siya sa iyang pamilya, malipayon gihapon siya diha sa kiliran sa iyang mga ka-trabaho. "When it comes to work, mura gihapon mi’g family, magtinabangay, magrespetuhay. I need them and they need me, vice-versa. Dili man sad nako makaya kung ako lang. Kung sila lang sad, di gihapon kumpleto. We’re like one big happy family, lain-lain lang og taras, lain-laing batasan. Adjust lang gyud ka," pasabot pa ni Louie Tsunami.

Una pa, duna ba siya’y lovelife sa maong sitwasyon? "Love makes the world go around and it takes time to grow. Although nindot man gyud unta idungan ang career ug love, usahay ma-complicated man gud. Kay maggahin kag time sa imong trabaho, imong uyab gahinan sad og time. Kung dili ka mohatag, mao na, mag-away, maglalis. Siguro I’ll settle down mga early 30’s or late 30’s na. Much better sa pagkakaron, nga gihatagan nako ang akong heart nga mopahuway og pitik bitaw, ha ha ha. ," nagkatawang pagtapos ni Louie Tsunami sa makalingaw nga jamming.