Katrina Halili ug Bullet Jaloslos break na?

Wala magdugay ang panaghigugmaay nga misulbong tali nilang FHM cover girl Katrina Halili ug sa bagitong si Bullet Jalosjos.

Sa dihang nahinabi ning tigbalita didto sa dakbayan sa Dapitan diin ang iyang pamilya nakapanag-iya og dagkong mga patigayon lakip na niini ang pipila ka mga notadong beach resorts, si Jalosjos mikumpisal nga nagka-uyab sila ni Halili apan break na sila karon.

"Oo naging kami, pero sa ngayon ay break na kami. But we're still good friends," matud pa ni Bullet, anak ni kanhi kongresista Romy Jalosjos nga maoy tag-iya sa inila kaayong Dakak Park and Resort sa Zamboanga del Norte.

Sa wala pa ma-abot si Katrina sa iyang kinabuhi, nabaniog nga uyab ni Bullet mao si Nancy Castiliogne. Sa wala pa hatagig luna sa iyang kasingkasing si Bullet, nakarelasyon ni Castiliogne sila si Luis "Lucky" Manzano ug si Paolo Contis.

Apan pipila ka mga waiter sa Dakak diin si Castiliogne kanunay magbisitaan nakugang sa balita nga nagbuwag na ang duha.

"Talagang na-surprise kami kasi ang sweet-sweet nila pag magkasama sila dito sa Dakak. Akala namin sila na ni Nancy ang magkatuluyan kasi nagpagawa na nga ng bahay si Sir Bullet," matud pa sa waiter nga mihangyo nga dili lamang ipasulat ang iyang pangan.

Usa sa mga mitumaw nga hinungdan sa break-up nilang Castiliogne mao si Katrina Halili, apan gihimakak kini ni Bullet.

"Naku hindi, wala na kami ni Nancy nun. Ngayon, Nancy and I are still good friends. Magkasama nga kami minsan mag-gym kasi nagbo-boksing din siya," dason pa ni Bullet, nga dili pa dugay nagtukod og kaugalingon niyang boxing stable sa Dapitan.

Naila-ila ni Bullet si Katrina sa dihang nag-taping ang Eat Bulaga, nga gipanag-iya sab sa pamilya ni Bullet, didto sa Dapitan upat ka bulan ang milabay. Human niadto, nagkasuod og maayo ang duha sud sa tulo ka bulan.

Bisan pa man sa iyang pamahayag nga wala na sila ni Katrina, daghan gihapon ang dili motuo gumikan kay pipila pa lamang ka adlaw ang milabay nag-uban sila si Bullet ug Katrina didto sa Dapitan.

Gani si Katrina mitambong sa weigh-in sa "Double Trouble" boxing card niadtong Lunes didto sa Gloria de Dapitan agig suporta ni Bullet nga maoy nagpasiugda sa maong labing unang championship fight sa Dapitan.

"Manood pa sana siya ng boksing kaya lang meron pa siyang ibang commitments sa Manila kaya umalis kaagad siya," pag-angkon pang Bullet.