Hugyaw sa bisrock

Unom ka buwan human gilusad sa Banat Hugyaw ug The Freeman Entertainment ang agresibong kawsa nga mahatagan og luna ug kahigayonan nga maila ang mga personahe ug pwersa nga nagpaluyo sa gitawag karon nga "bisrock phenomenon" gihangop og maayo sa katawhang Sugbuanon ang ilang musika. Enero ning tuiga sa dihang namugna ang nahisgutan nga kawsa-kawsa nga sa sinugdanan ang Freeman Entertainment, Banat Hugyaw ug Smash FM lang ang nagpalambo. Dili sayon ang pagpalawod sa nahisgutan nga kawsa kay kasagaran sa mga pasiunang reaksyon nga among nadawat puro pagpanaway kay matud pa walay interesado nga mobasa kalabot sa mga bisayang banda nga mga wa-il kon wa ilhi. Dunay miingon nga nag-usik lang kami sa panahon ug pahina tungod kay ang mga batan-on sa atong henerasyon karon- "baduyan ug usahay OA-han" sa bisrock bands. Apan kining tanan wala namo igsapayan, hinunua gihingusgan ug gipalig-on namo ang maong kawsa tungod kay nagtuo kami nga moabot ang adlaw nga hangpon ug mapasigarbohong angkonon sa kadaghanan ang bisrock bands. Busa agi usab og pagtamod ug pagtahod sa suporta nga ilang natagamtam pipila ka bisrock bands ang mipadayag sa ilang kasing-kasing nga pasalamat.

1. Daghan jud salamat sa pagsuporta sa Bisrock ug pagsuporta sa mga banda kay dako kaayo og natabang ang Banat Hugyaw ug The Freeman Entertainment sa Bisrock karon. Isa sila sa mga tinood nga nagsuporta sa atong kaugalingon na nga mga banda. More Power sa inyong mga staff labi na ni Maam Eleanor nga sukad sa una nagsuporta na sa mga banda sa Sugbu…JimiCycle band ang nagpasikat sa mga kantang "Bakasi, Lansiao ug Unsa ning tamaa?"

2. Kadto nabasa nako ang article sa Banat Hugyaw about sa among banda, grabe hurot jud ako bilib sa inyo suporta. Thanks jud kaayo-Kurt, bahista sa Yied nga maoy tag-iya sa mga kanta nga "Bayot Ka Man Diay, Magsilbi Pa Ba ug Pungko-pungko"

3. Pasalamat mi og dako sa Banat Hugyaw nga nahatagan mi og space nga ma-feature ang among album and the tracks. Salamat sa suporta. - Jimboy keyboardist of Makadawa ang nagpauso sa mga kanta nga, "Gasolina, Mangga ug Duwaan."

4. Way back 1996 na-a na nang mga Bisdak, kadtong time sa Bugz pero Banat Hugyaw ug The Freeman Entertainment maoy una nga nagtagad ug naghatag og bili sa local talents through interviews, features and recommendation sa radio programs. Salamat sa suporta.- Abraham, vocals/ guitarist, Medias band, nga maoy nagkanta sa Free (Libre Patupi) ug Mr. Clean.

5. I firmly believe that Banat Hugyaw and the Freeman Entertainment were the first to have focused the spotlight to bigtime and smoltym Bisrock Bands, they appreciated every single song bisag di pa sikat. Freeman and Banat, Rock!- Ray, vocalist of Indephums, tag-iya sa mga kanta nga "Negatibo, Positibo ug Hulmigas."

Tungod sa inyong makabungog nga pag-abiba sa bisrock bands ilusad na usab sa Banat Hugyaw ang lain na usab nga kawsa, nga mas detalyado, mas kompleto ug mas palawman pa ang pag-ila sa inyong mga paboritong bisrockers. Atangi , pipila ka adlaw na lang!