Uwahing kalambuan sa Miss Universe Pageant

Nagkainit na gayud og maayo ang nagsingabot nga Miss Universe Pageant diin ang koronasyon mahitabo na karong Domingo didto sa Shrine Auditorium sa Los Angeles California. Sugod sa pag-abot sa kapin 80 ka mga maanyag nga mga babaye gikan sa tibuok kalibutan, lima lang alang sa Los Angeles Press ang ilang gituohan nga maoy mag-ilog sa korona. Base sa taho sa Missosology.Org ang lima gitawag karon nga "hotlist." Sila mao si Miss Mexico Priscila Perales, Miss Puerto Rico Zuleyka Rivera, Miss Canada Alice Panikian, Miss Ghana Angela Asare ug Miss Poland Francys Sudnika. Gawas kanila, ang ubang mga kandidata nga nakadapit usab sa pagtagad sa Press sa LA mao sila si Miss Iceland Sif Aradottir, Miss Brazil Rafaella Zanella, Miss Paraguay Lourdes Arevallos ug Miss Trinidad and Tobago Kenisha Thom. Samtang ang paborito sa press photographers sa LA mao sila si Miss Salvador Rebecca Iraheta, Miss Bolivia Desiree Duran ug Miss Thailand Charm Osathanond.

Apan kon ang mga nahisgutan maoy paborito sa LA press duna usay giintriga nga mga paborito usab sa Miss Universe Organization tungod kay sila maoy kanunay nga ipadala sa mga exclusive parties ug TV guestings. Gani nasayran nga ang 20 ka mga kandidata nga gipili aron maoy himoong cover girls alang sa advertising campaign ug video sa pageants naglakip sa mga kandidata gikan sa Puerto Rico, Colombia, USA, Trinidad and Tobago, Belgium, Ukraine, Angola, Australia, Japan, Iceland, Spain, Ethiopia, China, Ghana, Canada, Nicaragua, ug Mexico. Sa pre-tape segment usab alang sa sikat nga nightly show sa NBC nga "Last Call with Carson Daily," ang gipatekang mao sila si Miss Canada Alice Panikian, Miss Sri Lanka Jacque Fernandez, Miss USA Tara Conner, Miss Mexico Priscila Perales, Miss Sweden Josephine Alhanko, Miss Ukraine Inna Tsymbalyuk, Miss Japan Kurara Chibana, Miss Ecuador Kay Lopez, Miss Argentina Magali Romitteli ug Miss Namibia Anna Nashandi.

Ang pambato sa Pilipinas nga si Lia Ramos wala mulugwa sa nagkadaiyang aktibidades sa Miss U. Apan ang mga beauty experts sa Missosology. Org mihulagway kaniya isip " well -groomed, beautifully tanned, sweet, educated ug very classy. Suma pa nga siya susama og nawong ni Miss Universe 2000 Lara Dutta. Gidayeg usab si Lia tungod kay maayo ang iyang mga tubag atol sa interview sa press ug sa pre-judging tungod kay dili siya "over-acting ug over confident." Gani dunay miingon nga dili imposibli kon malakip siya sa Top 20. Sa nasayran nga sa labing unang higayon, 20 na ka mga kandidata ang pilion isip semi-finalists inay Top 10 lang nga maoy naandan sa daghan nang mga katuigan.

Sukad usab nagsugod og pangabot ang mga kandidata niadtong July 5, daghan ang nabantayan nga labihan ka maldita ug labihan ka naning. Gani si Miss Australia Erin McNaught hapit mahapla tungod kay gitukmod siya sa usa ka kandidata nga buot magpa-atubangan sa dihang nagsugod og kuha sa ilang hulagway ang LA press photographers. Tinukmoray, dinuotay ug dinautay-kini maoy sitwasyon sa nagkainit na nga indigay diin matud pa ang mga kandidata gikan sa Americas maoy labihan ka mga init og ulo nga kon maglagot lupig pa ang Mayon Volcano sa kamangtas.

Gidungog usab nga gipapauli sa Miss Universe Organization si Miss Poland Francy's Sudnicka tungod kay dunay duha ka kandidata nga mireklamo kay matud pa dili gayud siya tinood nga representante sa iyang nasud sanglit miapil siya sa Miss Venezuela Pageant. Gani ang dismayado nga kandidata gikan sa South America mipakita pa og mga hulagway pagmatuod sa iyang pasangil. Labihan nga nakadangoy-ngoy ni Miss Poland ug human siya miatubang sa kadagkuan sa Miss U, gitugtan siya nga makasalmot sa indigay. Nasayran nga nahulga ang mireklamo nga kandidata tungod kay si Miss Poland paborito isip usa sa makasulod sa Top 10.

Walay bisan usa ka kandidata nga makaipsot tungod kay ang dapit nga ilang adtoan dunay mga cameras nga nagsunod sa ilang mga lihok. Duna usab silay mga chaperons nga maoy nagbantay sa matag minuto nila nga gibuhat. Karong tuiga, ang labing mubo nga kandidata mao sila si Miss Malaysia Melissa Ann Tan, Miss Northern Marianas Shequita Benett ug Miss USA Tara Conner kinsa duna lay gitas-on nga 5'5. Ang labing tag-as nga kandidata mao sila Miss Canada Alice Panikian, Miss Nigeria Tienepre Oki ug Miss Venezuela Jictzad Vina kinsa 6'1 ang height. Ang labing tiguwang nga mga kandidata sa pangidaron nga 26 anyos mao sila si Miss Germany ug Miss Poland. Ang labing mga bata nga kandidata sa edad nga 18-anyos mao sila si Miss Antigua and Barbuda, Miss United Kingdom ug Miss Uruguay. Ang atong pambato nga si Lia Ramos dunay gitas-on nga 5'7 ug 25 anyos.