Puppy-Eyed Kirtmen mo-jam sa Mingla band concert karong gabii

Atangi ang "Puppy-Eyed Kirtmen" nga makig-indigay og pahawray sa pagkuting sa mga instrumentong pangmusika, makiglinubagay og distortion, ug makigbinunalay sa drums alang sa makabungog nga paningog sa Bisrock karong gabii mga alas ocho ang takna diha's Minglanilla Sports Complex kauban ang lain pang mga Bisrockers ug show bands alang sa ipahigayong "The Best of Showband with the Bisrock Band Live Band Concert" nga siguradong hugopan tungod sa matang sa lingaw nga ikahatag niini.

Balik wholesome ang Seiko

Gipul-an na gayud tingali ang Seiko Films sa pag-build up og mga bold stars nga dili magdugay, managko ang mga ulo ug dili na motuman sa mga pahimangno sa nagmugna ug nagkaplag nila. Namatikdan nato nga daghan na kaayong mga gi-discover ug gi-build up sa Seiko Films nga makahimo lang og pila ka mga pelikula, magtuman na sa ilang gusto busa, mosangko na hinoon sa ilang kapakyasan.

Kini mao tingali gayud ang labing dakong hinungdan nga mibalik na lang sa paghimo og pelikulang wholesome ang Seiko Films pinaagi niining latest offering nilang nag-ulohan og " I Wanna Be Happy."

Kini usa pa gyod ka star-studded movie kay gipangulohan kini sa duha gayud ka tried and tested nga mga artista nga nakahimo na pod og pipila ka mga wholesome movies kaniadto sa pila na ka tuig ang nakalabay sama kanila ni Gloria Romero ug Eddie Garcia. Nalimot na ko sa daghang mga pelikulang nahimo ni Gloria Romero para sa Seiko Films, apan walay molalis nga si Gloria nagpabiling usa sa mga respetadong mga artista sa nasod ingon man si Eddie nga mahinumduman nako sa pelikula sa Seiko Films nga nag-ulohan og " Kapitan Karingal," samtang laing respetadong award winning actress, si Cherrie Pie Picache, apil usab sa maong pelikula gawas sa duha ka mga batan-ong mga artista sa Seiko Films nga nagpabiling anaa gihapon tungod kay naminaw sa mga tambag sa nauna kanila sa movie industry, sila si Diana Zubiri, Alfred Vargas ug Christian Vasquez.

Ang tulo nagsugod sa pagpa- sexy, apan hinayhinay nga miiswag ngadto sa pagka wholesome. Silang tulo angayan usab himoong sumbanan sa mga bag-o karong giumol nga mga artista sa CCTN, kay may namatikdan na raba ko, nga duna nay pipila kanila, nga naghinayhinay nag tubo ang sungay. Usa gani niini, kay matod pa, nagustohan sa cameraman, moapil na gani sa pag direct nga wa raba gayud unta siyay labot sa project kay dili pa man siya artista sa gihimo karon sa cameraman nga, dili usab mao ang director.

Tambag lang. Bato bato sa langit, ang matamaan, ayaw lang kasuko, wa mo hinganli, pero ayaw paabotang hinganlan mo, kay palaaway sad ko. Dili ba, Roger Serna, Ehda Dagooc, Divine Sanchez Hizon Ngujo, ug Julian Tancawan Fitoy Vahawan?