Angel ikiha sa mga Calayan

Gikatahong naglaraw karon ang magtiayong Dr. Manny and Pie Calayan nga ikiha ang ilang endorser nga si Angel Locsin tungod sa matud pa wala pagtuman niini sa gikasabotan nila sa kontrata.

Ang taho nga nakutlo sa PangMasa nga naglagot ang magtiayon ngadto kang Angel tungod kay dunay nakahagawhaw nila nga nagpa-facial ang sikat nga young star didto sa Belo Medical Center.

Matud pa sa tinubdan sa PangMasa nga natural nga maglagot ang magtiayon kang Angel tungod kay labihan ka dako sa ilang gibayad ngadto sa young star busa dili mahimo nga masigpatan siya didto sa nataran sa ilang karibal ug labaw na nga dili siya mahimo nga magpa-treatment didto.

Apan matud pa nga si Angel dihang gipangutana sa magtiayon kalabot sa maong taho, perteng nakapanghimakak hinungdan nga naglibog ang mga himantayon og huna-huna kinsa ang babaye nga nakit-an didto sa klinika ni Vicki Belo.

Dunay miingon nga hayan si Glaiza de Castro kadto kinsa look-alike ni Angel Locsin.

Apan ang pangutana, madayon ba ang maong kiha batok kang Sabina o mahilot ra ang tanan pinaagi sa iyang "Majika?" Marco nakagusto ni Valerie

Nakugang si Marco Alcaraz sa balita nga naglambigit kaniya kang Jennylyn Mercado tungod kay matud pa niya dili tinood nga nanguyab siya sa nahisgutan nga Starstruck winner.

Matud pa ni Marco ngadto sa PangMasa, naluoy siya kang Jennylyn tungod kay kanunay kining napiit sa intriga apan walay katinuoran ang taho nga nanguyab siya niini.

Matud pa ni Marco kaduha ra niya nakauban si Jennylyn- "Extra Challenge ug Huwag Kukurap" ug wala gayud siya mangulitawo ni nagpabati-bati ngadto sa dalaga.

Iyang giangkon nga si Angelica Panganiban ra ang iyang gipanguyaban apan dihang nasayod siya nga nagkauli na ang dalaga ug si Carlo Aquino wala na siya mopadayon sa iyang tinguha.

Karon nga si Valerie Concepcion na ang iyang partner sa 'Love to Love" wala malikayi nga gipangutana siya kondili ba kini niya panguyaban apan mipahiyom una kini una pa mitubag. Matud ni Marco bisan kinsa nga lalaki imposibli nga dili makagusto kang Valerie sanglit buotan, maanyag ug labaw sa tanan matinud-anon.

Miingon siya nga sa pipila pa lang nila ka tapings nagkasuod na sila ni Valerie gani gisultihan naman siya sa dalaga kalabot sa iyang kagahapon. - Ryan Mark

Juday pabilin sa Kapamilya

Dili na mahinayon og tapon ngadto sa Kapuso network si Judy Ann Santos tungod kay mipirma na usab siya og laing kontrata ubos sa Kapamilya network.

Ang taho sa PangMasa nagkanayon nga mi-renew si Juday human niya makita nga labihan ka taas sa rating sa ilang soap opera ni Piolo Pascual nga "Sa Piling Mo."

Dugang taho sa PangMasa nagkanayon nga sa dihang gipakita ni Alfie Lorenzo ngadto kang Juday ang iyang weekly payment alang sa iyang umaabot nga shows sa Kapamilya labihan ka dako sa pahiyom niini.

Kini tungod kay matud pa nakasiguro na si Juday nga dili na maglabad ang iyang ulo og huna-huna asa kuhaon ang pangbayad alang sa iyang properties ug investments.

Hapit na mahuman ang "Sa Piling Mo" ug sunod nga makit-an si Juday sa big screen na alang sa pelikula nga "Kasal, Kasali, Kasalo" kauban ang iyang hinigugma nga si Ryan Agoncillo.