Hatag og lugar sa Yield

Lab-as pa gikan sa nahumang back-to-school concert nga giulohan og "Turn The Page" diha's Rooftop Halo-Halo sa Tabunok, Talisay City kahugoy-hugoy ang ubang mga Bisrock bands, gipaluyohan sa One-Eight-Seven Production, ang bandang "Yield" nangandam na usab sa laing linawas nga pasundayag nga nakasentro sa paghatag og tribute alang kang grungeboy Nirvana main man Kurt Cobain nga gikatakdang mahitabo sa Hulyo 22 diha's Talisay Sports Complex.

Sa pakighinabi ning tagsulat kanila sa nakalabay'ng semana, nahibaw-an nga wala pay duha ka buwan sa dihang naporma ang ilang pundok. Hinoon, aduna na silay nasugdang duha ka recordings sa ilang unom ka komposisyon nga gitagik ni rhythm guitarist Florante "Nante" Deiparine, Jr. bisan pa man og niadtong tungora wala pa silay matawag og hinugpong nga bansagon.

"Diha mi adto sa may Sencia's dapit sa flyover sa Banilad when we spotted this traffic sign YIELD, and thought it cool to be adopting the name for our band. Besides it carries positive implications. Yield stands for to give way, give in, harvest," pamahayag ni Brendo "KurtBrendo" Cabañero, ang bahista sa tropa.

Ang Yield naglangkob nilang Rolly "Rholz" Ignacio (graduate sa BS Accountancy, University of the Visayas), Melcher Joy "MJ" Mendez (lead guitarist, Electronics Technology graduate sa Cebu State College of Science and Technology), Mark "Macko" Rafols (Computer Systems/Programming graduate sa Amable Mendoza Aguiluz Computer College), Nante (Information Technology graduate) ug Brendo (Computer Science graduate, puros gikan sa Asian College of Technology).

Inabagan sa lahugay nga inspirasyon sa ilang mga musical influences - classic Gary Lewis (sa Playboys niadtong '60s), American hard rock band "Guns and Roses" nga misulbong ang bitoon sa dekada ochenta, alternative rock trio "Better than Ezra" sa New Orleans, Louisiana; alternative rock/post-grunge "Collective Soul" sa Stockbridge, Georgia; ug contemporary rock band "Silverchair" sa Australia, ang pundok nakabaton og katakos magmugna og unom ka kanta alang sa ilang gipangandamang Extended Play album nga may ulohang "Pasmo" nga gihunhugong ma-release sa Septembre puhon.

Ang "Bayot Kaman Diay" usa sa mga tracks nga nag-unang nakalangkat og pagtagad sa dihang nanganawkanaw na kini sa kahanginan usa ka semana gikan sa pagsubmiter niini alang sa usa ka proseso sa paghashas sa 93.1 Smash FM pinaagi ni DJ Ramil "Ram Milby" Dizon. Nagkanayon si Nante, "well, story was written based on experience of having mistaken a transvestite for a real woman".

Giangkon usab ni Nante nga nasuwat niya ang Bayot Kaman Diay tungod kay dili gayud siya layhan sa mga mahuyang magtan-aw labi na og nagbinabaye na sa pamorma. Iyang nasuwat, "akong balikon ang nangagi sa akong kinabuhi/kadtong naibog ko ug babaye nga lubos puti/sexy kaayo ug iya kong nadani…sige na/tingog na/haron magkaila tang duha/…diri ba kay lagyo ra kaayo ta/..unsa man gyud ang imohang tuyo (bayot kaman diay!)

Tataw na lang nga buot ni Nante nga ipasupot lagbas sa katilingban nga ang usa ka lalaki kabugal-bugalan gayud kon iyang ipamugos nga magbinabaye sa pamiste ug pamorma, nga kon buot huna-hunaon mahimo mang mahuyang ka lang gihapon apan produktibo bisan pa man og dili bag-ohon ang hitsura nga mosangpot lang sa pagpanglansis og mga tawo.

Laing track, nga nakalusot usab sa gihimong paghashas mao ang "Magsilbi Pa Ba?" nga may kalabutan sa pangutana kon unsa naman lang ang dangatan sa atong mga pagpaningkamot kon ang mga nag-alirong kanato nagumon na sa bisyo.

Usab, gibatbat ni Nante nga nasuwat niya ang maong kanta tungod sa iyang anak nga si Bryan Stephen, tres anyos, nga buot niyang magpuyo og usa ka hapsay ug malinawong komunidad. "He deserves a world so much better than the kind of society I am living in right now. I know every parent would want that for their children," paghimug-at pa ni Nante.

Karong bulana, naghandom ang pundok nga ma-record na ang "Pungko-Pungko", nga mao usab ang akong paboritong track tungod kay usa usab ako sa mahilig niining maong dining trend, labi na gayud og gikan sa akong pagbaklay makaagi ko sa JY Square area sa Lahug aron mokaon sa "McDo(ko-duko) street dining fashion", diin ang kinaham nakong sinugbang pusit nga tag P7 ug mamisong puso makatambal na sa kagusla. Sa pungko-pungko/binuwad nga nukos, ngohiong ug bola-bola/isawsaw sa suka/ginabot, lumpia, atay sa baboy ug chorizo.

Usab niining maong food stalls, mag-abot ang nagkadaiyang matang sa tawo gikan sa nagkalandrakas nga lakat sa panginabuhi aron sawhan ang baratong pagkaon - "Pulis/bugoy/tindero/empleyado/dato, pobre si dodong ug ate…"