Kasikas sa Miss Universe 2006

Karong adlawa gikatakda na nga magsugod og abot didto sa Los Angeles California, dul-an 90 ka mga maanyag nga babaye gikan sa nagkadaiyang nasud alang sa labing dako nga indigay sa kaanyag- Miss Universe 2006. Apan niadtong Marso pa lang nagsugod na og bukal ang kainit sa kompetisyon diin gisugdan na ang tigi alang sa "People's Choice" sa informal voting nga gipasiugdahan sa website sa Missosology.org. Sa labing uwahi nga tally, nag-una gihapon ang pambato sa Dominican Republic nga si Mia Taveras diin higpit niya nga katigi mao si Miss Sri Lanka Jacqueline Fernandez. Nagsunod si Miss Lebanon Gabrille Bou Rached, diin mikompleto sa "magic four" si Miss Indonesia Nadine Chandrawinata. Ang atong garbo nga si Bb. Pilipinas Universe Lia Andrea Ramos anaa sa ikapito nga dapit. Ang sunod nga tally ipagawas karonng July 15.

Sa pagsugod og bukal sa kainit sa kompetisyon sa maong indigay, unang nasugamak sa kontrobersya mao si Miss Australia Erin McNaught. Kini tungod kay nasakpan si McNaught nga nag-topless alang sa cover sa usa ka men's magazine didto sa ilang nasud. Si McNaught kasamtangan pa nga nagbansaybansay atua sa lain nga nasud busa wala pa siya'y reaksyon. Hinoon ang national director Miss Australia beauty pageant mipasalig nga moabot gayud si Mc Naught didto sa Los Angeles alang sa Miss Universe 2006 pageant karong July 23.

Ubay-ubay sa mga kandidata alang sa Miss Universe ang nagpanon didto sa Venezuela alang sa last minute training. Ang mga nahisgutan naglangkob kanila ni Miss Ecuador Katty Lopez, Miss Aruba Melissa Lacle ug Miss Germany Natalie Ackerman. Samtang si Miss Switzerland Lauriene Gillieron maoy kauban karon ni Miss Venezuela Jictzad Vina nga personal nga gi-train sa nabantog na kaayo nga si Osmel Sousa. Samtang ang atong pambato nga si Lia gikatakda nga muabot karong adlawa didto sa Los Angeles California human sa dul-an usa ka buwan niya nga training didto sa Colombia ubos sa mga kamot sa lain usab nga bantogan nga si Alfredo Barraza.

Samtang karon pa lang daan gidungog na nga paboran sa Miss Universe Organization ang mga Latina beauties sama nila ni Misses Dominican Republic, Colombia, Mexico, Puerto Rico ug Venezuela. Ang taho matud pa nga niadtong May 16 to 18 ang nahisgutang mga kandidata milupad paingon ngadto sa New York City ug milugwa sa nagkadaiyang television programs, gawas pa nga nakigtagbo usab sila sa kadagkuan sa Miss Universe Organization diin gipaila usab sila ngadto sa mga sakop sa media. Tungod niini duna nay mga nagyaw-yaw nga dili na kahibudngan kon usa niining mga nahisgutan ang masulod sa top five ug diretso nga modaug sa korona.

Ang kasamtangan karong nagsul-ob sa korona mao si Miss Canada Nathalie Glebova. Tungod niini dunay mga miingon nga dili usab layo ang posibilidad nga ang representante sa maong nasud usab ang mosunod sa korona. Apan ang mga beauty experts nagdungan sa pag-ingon nga imposibli nga mahitabo nga ang mga pambato sa samang nasud magsunod ang kadaugan sa Miss Universe. Hinoon ang mga kadagkuan sa nahisgutan nga indigay namahayag nga kon tiunay nga maanyag ug nagbaton sa mga hiyas nga ilang gipangita si Miss Canada 2006 Alice Panikian walay rason nga dili siya sul-uban sa korona.