Jennylyn naka pesos sa GMA-7

Giyawyawan gayud diay si Starstruck winner Jennylyn Mercado sa GMA Artist Circle gumikan kay matud pa "ka-cheapan" na ang mga isyu nga naglambigit karon kaniya diin bisan kinsa na lang ang mga lalaki nga gikatahong iyang iring-iring.

Samtang nabantayan ni Manay Lolit Solis kolumnista sa PangMasa, nga human magyawyaw si Alessandra de Rossi sa S-Files batok kang Jennylyn nagpakahilom na gayud ang naulahi.

Nasayran nga gawas kang Jeremy nga giingon iring-iring ni Jen nga hugtanon niyang gipanghimakak, gilambigit usab siya kang Patrick Garcia.

Samtang gitin-aw ni Manay Lolit nga natapos na gayud ang "special relationship" nila ni Mark Herras ug Marian Rivera tungod kay mas gipalabi sa nahauna ang iyang career karon ilabi na nga namuwak kini og daghang proyekto.

"EB Babes" gigastuhan

Gigastuhan gayud og dako sa TAPE Inc. ug "Eat Bulaga" ang 22 ka finalists sa "EB Babes". Tuod man nagsugod kagahapon ang usa ka buwan nga training sa mga finalist diin magpabilin sila sulod sa training camp didto sa Sitio Lucia ,Bulacan.

Nabantayan sa PangMasa nga nindot gayud ang maong training kay dili lamang pagbansay-bansay sa mga nagkalain-lain nga matang sa sayaw, lakip ang street dancing pagatun-an usab nila, kundi aduna usab silay training sa singing, movie and TV acting, stage acting, image enhancing ug lakip na ang pag-make-up sa ilang mga dagway.

Ang banggiitan na kaayo nga si Maribeth Bechara maoy ilang Dance Master ug daghan pa nga mga instructor ang ilang makauban sulod sa 30 ka adlaw.

Human sa hugot nga pagbansay-bansay usa lang ang ilhon nga champion, nga makadawat sa P1 million nga cash prize ug management contract gikan sa TAPE, Inc.

Donita wa pa ka desisyon

Humanun una ni Donita Rose ang usa ka season sa "Mobile Kusina" nga ipasalida matag Biyernes alas dyes sa buntag sa GMA-7,una siya muhukom kon magpabilin ba siya sa nasud kauban ang iyang bana ug anak o hingpit na gayud sila nga manimuyo didto sa nasud sa Singapore.

Nasayran sa PangMasa nga labihan ka masinabtanon ni Eric kang Donita hinungdan nga gisugtan niini ang kanhi VJ nga magpabilin una dinhi sa Pilipinas sulod sa tulo ka buwan kay nakasabot gayud ang iyang bana nga gusto sa iyang asawa ang kinabuhi sa showbiz.

Busa gikatakda nga pagasabutan nila og maayo ang bahin sa showbiz career ni Donita hilabi na nga ang panginabuhian ni Eric atua gayud sa Singapore.

Hinoon mahimo man gihapon nga magbalik-balik dinhi si Donita kon aduna man gani maayo nga nga offers.