Buzybuddies, nagpabiling mabudlaton

Luyo sa minilyong mga pagsulay, mga delubyo, mga dogdog ug kilat ug unsa pa dihang mga katalagmang mahiaguman, ang dance group ni Boyet Sasuman nga gitawag og BuzyBuddies, nagpabiling mabudlaton sa tanang panahon sukad pa sa pagtukod ni Boyet niini mga pila na ka dekada ang nakalabay. Dili pa hinoon mga tiguwang ang mga members sa maong dance group, kay ang mga sakop niini, kon mahanas na gayod kaayo sa pagsayaw, ipadala man usab ni Boyet ngadto sa Japan aron adto didto mo-entertain sa mga pikot, ug manawat na pod siya og laing mga batan-ong mga sakop ug kinahanglang, importante alang kang Boyet nga adunay gitas-on ug naturalmente, may kaanyag ug mga kaambong nga mahagpat. Kon matapos na ang kontrata sa iyang mga dancers didto sa Japan, nga kadaghanan, ma-renew gayod ug dili na gayod gani malikayan nga kapuyon kini og gusto nang mobalik sa Pilipinas, dili kini malimot sa pagdala og mga sinugatan alang kang Boyet.

Karong bag-o pa lang, nagmugna na usab si Boyet og banda nga gitawag og Koozi Band nga ikauban sa BuzyBuddies sa show nila didto sa Lutopan, Toledo City, ugma, ug sa sunod ugma, Hulyo 5 ngadto sa Hulyo 6. Makita sa hulagway sila si Nieva, Lee, Maricris, Lacsmi, Chad, Nina, Janice, Lord Saisi ug Maricel.