Pagsulbong ni Nikki

Batan-on, maanyag ug dunay talento. Kining tanan, gipakyaw sa bag-ong singer/host nga si Nikki Bacolod. Apan bisan pa man sa iyang naangkon nga mga kalampusan, nga gipangandoy sa kadaghanan, nagpabilin siyang mapaubsanon. "Wherever I go I know God will lead me," pasiuna pa ni Nikki sa dihang nahinabi sa Banat Hugyaw didto sa Casa Verde bag-ohay lang. Dinhi sa Sugbu ang nahisgutan nga young star sanglit guest performer siya sa concert ni Pop Heartthrob Mark Bautista didto sa SM Cinema 2 niadtong Sabado sa gabii.

Nagkanayon ang 16-anyos nga dalaga nga duol siya sa Ginoo isip usa ka magtutuo nga Protestante, rason nga naila siya nga "down to earth." Gani bisan og inanay na siya nga misulbong sa iyang gipili nga kalibutan nagpabilin pa gihapon ang iyang maayong pamatasan. Gani mopahiyom ug moduko man lang siya kung daygon ang iyang kaanyag.

Si Nikki misantop sa panumduman sa publiko dihang misalmot siya sa Search for a Star in a Million sa ABS-CBN ug nahimong second runner up sa Boholano nga si Jerome Sala. Ang iyang nakab-ot sa maong indigay simbolo nga duna siya'y ikabuga aron makigtigi diha sa industriya sa kalingawan, nga matud pa niya sa bata pa lang siya gipangandoy na niyang puy-an.

Sa pakighinabi sa Banat Hugyaw kang Nikki, mibutyag ang naulahi nga sa dihang gitawag na ang pangalan ni Jerome Sala isip grand winner sa SIAM, nalipay siya. Diha nalang siya mitiyabaw sa dihang nahibaw-an niya, sa dihang misulod siya sa backstage, nga gikawat ang iyang cellphone. Gikaguol pa niya kini kay matud pa niya basin mangluod ang iyang mga higala ug paryente sa wala niya pagtubag sa ilang mga text messages.

Sa laing bahin, bisan pa man sa iyang ka-busy isip usa sa mga cast sa bag-ong youth-oriented show nga "Posh" sa QTV11 ug isip host sa Little Big Star Davao, diin kaduha siya sa usa ka buwan mag-tape og episodes, malipayon ang dalaga nga wala niya mabiyai ang iyang pag-eskwela. Third year high school na siya sa iyang home school study program.

"Og mo-stop og schooling matay-an niya akong utok," matud pa ni Nikki, nga hanas usab mo-binisaya.

Sa pagkakaron, gawas sa iyang regular hosting stint nangandam napud si Nikki sa pag-release sa iyang second single nga "Only When I'm With You" nga apil sa iyang self-titled first solo album released under Viva Records, diin siya usa ka contract star.

Ug matud pa niya, kung siya'y papilion gusto niyang maka-partner si Sam Milby o si John Lloyd sa umaabot niyang mga proyekto. Sa pagkakaron si PJ Rupert, Eat Bulaga's Mr.Pogi daily winner, ang iyang loveteam sa Posh diin kauban pud niya ang mga Starstruck graduates nga sila si Gian Carlo, Iwa Moto, Vivo Ouano, Rhea Nakpil, Vaness del Moral ug Princess Violago.

Si Nikki, bag-ong residente sa showbiz apan hinay-hinay na nga nagmugna og kasikas dili lang sa natad sa musika kon dili hasta na usab sa arte. - Ryan Mark