Pag-abot sa bag-ong banggiitang Kapuso

Kahibulungan, bang-giitan, dili mabangbang. Sa binayot pa nga pagkasulti, dili matata (buot pasabot, dili hilupigan). Kining tanan maoy muhulugway sa usa ka babaye nga nagdala sa ngalang Malou Mangahas, ang bag-ong Vice President for Research and Content Development sa News and Public Affairs department sa GMA-7. Sa bata pa lamang si Mangahas napanlantawan nang daan nga layo siya og maabot ug daghan siyag kalampusan nga mahuptan gumikan sa iyang pagkamaalamon.

Si Mangahas wala na moagi og grade six tungod kay gipadiretso na siya sa first year high school tungod sa kalantip sa iyang pangisip. Human sa upat ka tuig siya maoy valedictorian sa ilang klase. Pagligid sa mga katuigan, gawas nga mitapos siya isip cum laude, siya usab ang Most Outstanding journalism graduate sa University of the Philippines. Human niini mipalawod pa siya sa iyang pagkaplag og dugang kahibalo didto sa Harvard University isip Nieman Foundation for Journalism scholar.

Dunay kawsa nga gibarugan si Malou Mangahas ug ang iyang nag-aliwaros nga idealismo kaniadto maoy hinungdan nga nabalhug siya sa prisohan og tulo ka buwan niadtong 1980's. Ang kaso batok niya, nabasura niadtong 1987. Paglabay sa pito ka tuig, napili siya nga usa sa Ten Outstanding Young Filipinos gumikan sa iyang dili hilupigan nga abilidad sa investigative journalism. Siya usab ang labing bata nga nahimong Editor in Chief sa The Manila Times ug usa sa mga niumol sa karong gikasaligan na nga Philippine Center for Investigative Journalism. Dili na maihap ang mga kalampusan ug pasidungog sa usa ka Malou Mangahas sa kasaysayan sa pamantalaan dinhi sa nasud.

Karon ang labing uwahi nga kalambuan mahitungod kaniya mao ang posisyon nga karon iyang gihuptan sa GMA-7. Ang maong posisyon nagkahulugan nga siya maoy Editor-in Chief sa website sa nahisgutan nga network. Gawas niini siya usay mangulo sa Research Team sa GMA News and Public Affairs. Siya usab maoy momakmak sa tanang empleyado nga naa madestino sa News and Public Affairs Department. Ang naka-alegre mao nga kaniadto pa diay siya gidapit sa nahisgutan nga network alang sa maong posisyon apan nagsigi siya og balibad. Hinoon kaniadto pa siya na maoy executive producer sa malampuson kaayo nga "Debate with Mare and Pare."

Alegre nga hunahunaon nga ang hinungdan kaniadto nganong nagduha-duha si Malou pagdawat sa posisyon nga iyang gihuptan karon mao nga mawad-an na siya og higayon nga makapamubo sa iyang mga tanom. Apan sa katapusan mitando ra siya tungod kay buot niya nga atubangon ang lain na usab nga hagit diin madiskobre pa niya og maayo ang iyang katakus.

Samtang ang GMA-7 News and Public Affairs ubos sa pangulo niini nga si Marissa Flores malaumon nga dako kaayo og ikatabang ang paghiabot ni Malou sa ilang lawak balitaan gumikan kay bitbit sa naulahi ang talento, katakus ug kasinatian nga kaniadto pa gihangop na sa publiko.