Upat ka banggiitan

MetaFour. Sila ang bag-ong pambato sa bag-o lang natukod nga Brown Cow Entertainment Productions. Gitawag sila nga Metafour tungod kay upat ka mga binuhat nga napuno sa potensyal ang naglangkob sa ilang grupo- Donna (vocals) Francis (keyboards), MC (kahon ug vocals) ug si Ryan (guitar) nga kanhi tinun-an sa prestihiyosong UP Conservatory of Music. Ang ngalan sa ilang grupo mao usay titulo sa ilang labing una nga album.

"Friends." Ulohan sa ilang carrier single nga mihaom sa estorya sa ilang panaghugpong gumikan kay naumol ang maong grupo sa dihang nag-abot silang tanan sa kolehiyo. Naggikan sa nagkadaiyang banda, nagka-uyon sila nga maghiusa.

MetaFour CD. Gawas sa Friends nga kanta, ang album sa maong grupo nagtangag usab sa mga kantang "Give It To Me," "One Day in Your Life," "I Just Can't Stop Loving You," "Bahala Na," "Handa Na," "Thinking About," ug "Love Floats."

Jimmy Antiporda. Ang usa sa tulo ka mga producers sa maong album maoy naghatag og dalan sa MetaFour aron tukma nila nga masubay ang pasikot-sikot sa music industry. Si Jimmy silingan ni Francis. Usa ka adlaw niana, nanuktok si Francis sa ganghaan ni Jimmy bitbit ang usa ka CD nga nag-ugom sa kanta sa grupo. Wala sila dawata dayon ni Jimmy, apan ang naulahi isip banggiitan nga composer/ arranger/ producer nakakita sa potential sa MetaFour, hinungdan nga iya silang gigiyahan. Pwes, pila bay estorya, ang MetaFour hingpit nga gipapirma og kontrata sa Brown Cow Entertainment sa hinapos nga bahin sa tuig 2005. Ang resulta mao ang self-titled album nga iapod-apod pinaagi sa Universal Records.

"Relevance" ni Gary V.

Human sa napulo ka tuig nga pagpaabot ug pagpakahilom subling tay-ogon ni Mr. Pure Energy Gary V ang music industry. Kini tungod kay human sa maong gidugayon, manghugyaw siya dalit ang "all original album" nga dunay ulohan nga "Relevance". Ginama ubos sa Universal Records pinaluyohan usab sa GV Productions Incorporated ug Manila Genesis Entertainment, ang 'Relevance" pormal nga gilusad didto sa kaulohan niadtong nakalabay nga buwan.

Ang career single sa album mao ang "Wait Forever" nga gihimoan na og music video ug makita na sa MYX ug MTV. Ubay-ubay usab ang mga ballads nga nalakip sa maong album sama sa "Even for A While, Sana Bukas, In Another Lifetime, Only a Friend, You Gave Me Reason ug You Are," nga duet nila ni Joni nga anak ni Eddie Villanueva. Nagtangag usab kini og mga huni alang sa mahiligon sa ikid-ikid sama sa "What You Want, Shake It Off ug ang 2006 version sa Wag Mo Sanang Isipin," diin ka duet niya ang iyang anak nga babaye nga si Kiana. Lig-on usab ang mga nagtinabangay aron maporma ang "Relevance" sama nila ni Gerald Salonga (maoy conductor sa orchestra alang sa Even for a While) ug Mon Faustino (arranger-producer sa In Another Lifetime).

Matud ni Gary nga nadamtan og napulo ka tuig una siya mibalik og pagawas og album nga puro original ang kanta tungod kay dili madali-dali ang pagtagik og mga kanta tungod kay kinahanglan nga ang imong suwaton mao kadtong mga huni nga naghatag nimo og kadasig aron pagtagik niini o mga kanta nga nagdasig sa ubang tawo aron ila kining suwaton para nimo.

Ang "Relevance" mapalit diha sa nagkadaiyang record stores lukop nasud.