Paminsar sa Makadawa

Ang mga lakang sa pagtugkad sa isyu politikal ug lain pang nagbagang mga isyu may kalambigitan ang katilingban, ilabi na ang usa ka sistema sa pagmani-obra nga maoy nakapa-agni sa pagkatap sa isyu sa paggawong mao ang nakakablit sa akong pagtagad may kalabutan ang album nga "Make Music" sa Makadawa.

Tataw kaayo diha sa ilang komposisyong "Gasolina" ang pag-atake sa usa ka pangagamhanan tungod sa mga kakulian niining makahatod og de kalidad nga serbisyo sa katilingbang Pilipinhon. Kining maong mga isyu nakapabuka og mga kahiladman ug nakapaduso og usa ka matang sa reporma nga mao ang motibo likod sa pagkamugna sa Gasolina, gipanday sa paminsar sa "Makadawa".

Apan wala mahatagi og luna nga matukar sa kahanginan ang maong musikanhong mugna tungod sa gikatahong militante nga mensahe niini.

"Kapila nisaka presyo sa gasolina, karong tuiga...harianong katilingban unsa inyong nadunggan? Hello Garci, hello? Bagulbol, reklamo sa mga mamumuo; kulang ang sweldo, duna pay tigpatanto/apektuhan negosyo, mokita ra'g sinsilyo...hugaw nga pamulitika...," mao kini ang panahom nga nagtagubtob diha's Gasolina.

Silang Davis "C.Vad" Abella (vocals), Jay Abasanta (guitars), Mark Dominic "Domzday" Laburada (bass), James "Jimvoy" Dionson (keyboard) ug Leonardo "Jun Hapon" Abasanta, Jr. (drums) nagkapundok ug naglaum nga bisan pa man sa matawag ug sagad nga kamabaw sa mga temang naglimin sa Bisaya rock music nga mga komposisyon, makakab-ot og giladmon, makakawhat og gilay-on, ug magbilin og usa ka maayong impresyon sa mga tigpaminaw.

Usa sa mga tumong kon tinguha sa Makadawa ang makamugna og mga kanta nga bisan pa man magpandong sa gawong sa kamabaw sa unang pagpaminaw niini, maghupot sa kawsa nga giisa sa mga gitawag og haligi sa Pinoy nga musika, sama sa mga music icons nga "Yano" ug "Asin" nga nagpalambo sa mga mapuslanong hunahunang progresibo.

Ang Makadawa gikan sa "rakamakadawa", nga kalit lang mitumaw sa hunahuna ni C.Vad, ang vocalista samtang nangita siya og mga termino kon mga berso nga moangay sa iyang buot hulmahon nga kanta ginamit ang mga impluwensiya sa Pearl Jam, Creed ug Beatles.

Ang rakamakadawa sinumput-sumpot nga termino alang sa "rockista/rakista/rocker" (raka), "to make" (maka), and "we can't do without" (dawa). Sa dihang nalumpong, nagakahulugan kini ug "this is the music we can't do without". Ug sa dihang gipung-ulan, nahatud ngadto sa "Makadawa" nga buot ipasabot "this is the music that we do".

Ang pundok mipahaum og mga Bisdak lyrics ngadto sa usa ka matawag og impluwensya sa paningog nga langyaw. Kini mao ang kolaborasyon nga gibuboan sa pundok og igong pagtagad sa tinguha nga mapasupot ang mensahe batok sa mga kanta nga nagkuwang sa gitawag og "social significance" ug "thread of continuity" sa mga linya niini.

"Making music is part of us, an outlet of determining whether we are in tune with our surroundings and with what we are doing. A language wherein we can all relate - whoever, whenever, whatever the condition is and how it is expressed. Makadawa is setting such state. We aim of taking everyone on a musical journey the Makadawanian way," mao kini ang hinugpong nga panahum sa pundok.

Ang ilang proyektong album nga may ulohang "Make Music" kon magmugna og musika usa ka testimonya sa hiniusang mga impluwensya sa natad sa arte sa lima sama pananglit sa dibuho ug drumplay nga gipahaum ni Jun Hapon, lyrics ni "Oi" variety show director C.Vad, sepra nilang Jay ug Domzday, duyog sa teklado ni Jimvoy nga usa ka music teacher sa A. Salonga.

Ang "Make Music" aduna nay pito ka kanta, ug tulo na lang ang gihulat niini aron mahingpit na ang maong proyekto. Apan bisan pa man og matawag pa nga hilaw ang maong recording sa unang pito, ang Makadawa nakapasupot na sa ilang usa ka mugna nga may ulohang "Duwa-an".

Nanganaw-kanaw na kini sa 93.1 Smash FM, ug ang mga requests gipatukar usab sa "YourVoice, YourChoice Tingog Kabataan" nga tulumanon matag Martes ug Huwebes, 9:30am-11:30am. Ang mga termino niini adunay dobleng kahulugan, apan dili saypon sa pagsabot ang Duwa-an kay kini nagtuki sa dili na malalis nga gamit sa mobile phones karong panahona, ug ang nag-"vibrate" nga kamatuoran nga lisud na kining isalindot tungod sa kaimportante niini sa nagkadaiyang kagamitan.

Sa laing bahin, ang "Mangga" nga lain pa nga matawag og hot item, nagakanayon: "manggang hilaw...sa dalan dunay daghan/Baratohon ana-a sa Colon/Ang tigbaligya taxi sundon", usa usab ka obserbasyon sa duha ka klaseng mangga nga gibaligya sa downtown area.

Una mao ang kinaham nga manggang prutas nga maoy tatak sa probinsya sa Sugbo tungod sa dakong tabang niining mapalambo ang industriya sa food production ug mainila ang maong mga produktong pang-export. Ang usa mao ang minugbo sa "manggamitay" nga maoy tawag sa mga kusog mangabang og mga babaye nga nagbaligya sa ilang dungog sa maong lugar, ang ilang fly-by-night operations, ug ang kalambigitan sa mga drayber sa taxi nga maoy mohatod kanila'g kustomer.

Ang ubang tracks sa "Make Music" nga mahimong i-stream sa mga Bisrockers, gi-upload na sa www.myspace.com/themakadawa, nga magsilbing usa ka sampler sa dagan sa Makadawanian nga paminsar.

Sa Hunyo 17, atangi ang Makadawa sa rooftop sa Halo-Halo diha's Tabunok, Talisay sa alas kwatro sa kahaponon alang na usab sa laing linawas nga pasundayag.

Dungag nga impormasyon mabatunan pinaagi sa pag-email kang C.Vad sa [email protected]. Ipuno sa inyong talaan sa friendster ang [email protected].