Kim ug Gerald loveteam, dakong hulga

Milarga na niadtong Miyerkules sa kaadlawon si Kim Chiu paingon sa Boracay. Walo ka lugar sa Habagatan ang bisitahon ni Kim isip kabahin sa iyang premyo diin ang Cebu maoy katapusan niyang duawon aron mahimamat og balik ang iyang mga higala ug makapasalamat usab siya sa tanan nga misuporta niya.

Suma pa sa tsika ni Christy Fermin ang beteranang kolumnista sa PangMasa, niadtong Martes sa gabii ang amahan ug igsoon ni Kim nagkabuang og pangita og balay nga kapuy-an sa Teen Big Winner sa iya unyang pagbalik na didto sa Manila.

Kini tungod kay matud pa ni Christy dili pa mahimong puy-an ni Kim ang iyang balay sa Chateau Valenzuela nga usa sa iyang mga premyo usab tungod kay kinahanglan pa nga kompletohon ang mga kagamitan didto.

Samtang human nakakita og condo unit didto sa Cubao sila si Kim, mideretso na sila didto sa Punchline Café diin kauban na nila ang Fil-Am nga si Gerald Anderson.

Matud pa ni Christy nga sa pagsulod sa duruha gikagubtan gilayon sila diin ang mga customers naglumbaanay na og kuha og hulagway sa duruha gamit ang ilang telepono nga dunay camera.

Misaka sa entablado ang duruha aron magpasalamat sa tanan nga misuporta nila ug matud pa wala gayud mohunong og pakpak ang mga customers hangtud nga gikanta ni Kim ang "Peng You."