ABS-CBN interesado kang Alfred

Nahutdan na ba og talents ang ABS-CBN? Kini maoy pangutana nga mitumaw human gikataho nga buot bawion sa Kapamilya network si Alfred Vargas gikan sa sabakan sa Kapuso. Si Alfred kanhi sakop sa Star Circle dungan nila ni Nadine Samonte, Dennis Trillo ug Bea Alonzo.

Check! Dunay nasagap nga taho ang PangMasa nga dunay nindot nga tanyag ang ABS-CBN alang kang Alfred diin himoon siya nga leading man ni Claudine Barreto alang sa usa ka soap.

"Maui" ang working title sa maong soap nga matud pa sa usa ka kasaligan nga tinubdan sa PangMasa adto pa gam-on sa Hawaii. Apan ang mga himantayon miingon nga imposibli nga sakyan ni Alfred ang maong offer tungod kay gipangga man siya og maayo karon sa GMA-7.

Gani gawas sa iyang special participation sa 'I Love New York" gikatakda na niyang sugdan ang laing season sa "Now and Forever" nga adto pa sa nasud sa Malaysia himoon.

Sa pagkakaron wala na si Alfred diri sa nasud tungod kay sama sa atong gibalita dinhi sa Banat Hugyaw niadtong nakalabay nga buwan, tua siya sa Washington D.C alang sa duha ka fashion show ni Pitoy Moreno diin nalakip usab ang atong paisana nga si Queen of Asia Oceania Maria Karla Rabanal Bautista.

Bayani nanghimakak

Dali nga gipanghimakak ni Bayani Agbayani ang balita nga mobalhin na siya sa GMA-7.

Samtang pabilin nga no comment si Ai-ai delas Alas sa susamang taho nga molayat na siya paingon sa Kapuso sanglit wala pa niya maistorya ang iyang manager nga si Kuya Boy Abunda. Nasayran nga si Ai-ai ug Bayani Agbayani pareho nga mga talents sa GMA-7 sa wala pa mahimong Kapamilya.

Paolo ug Miriam nag-taping na

Nagsugod na ang taping nila ni Paolo Bediones ug Miriam Quiambao alang sa ilang bag-o nga TV Show nga sa nabalita dinhi sa Banat Hugyaw dunay working title nga "Mix World Challenge."

Sa samang higayon walay hunong ang mga intriga nga buwag na gayud si Miriam sa iyang bana tungod kay padayon man usab siya nga nagpakahilom, nga maoy nakapadilaab og samot sa pagduda.

Miingon ang mga himantayon nga kon wala pa sila magbuwag wala unta mag permanente si Miriam dinhi sa nasud ug tua unta siya sa kiliran sa iyang bana didto sa Italy.

Ilang gitandi si Miriam ngadto kang Ina Raymundo ug Angela Velez nga kon hain ang ilang bana atua usab sila.

Eugene dugay nang way uyab

Hagbay ra diay nga walay ka relasyon ang TV and movie comedienne nga si Eugene Domingo, gani miingon siya nga dili na siya makahinumdom kun kanus-a pa nabakante ang iyang kasingkasing.

Pwes sa dihang nahinabi siya sa PangMasa nga mas haom nga siya maoy bida unta sa pelikula nila nga "Kapag Tumibok ang Puso: Not Once But Twice sa Imus Productions inay sila ni Senator Bong Revilla, Ai-ai delas Alas ug Miss International Precious Lara Quigaman.

"Mas bagay kasi sa akin ang title kasi wala akong lovelife, 'no!" komedya niya. "Kasi nga silang tatlo, may mga lovelife at sexlife sila. Eh ako, wala as in zero. Kaya sana nga tumibok na ulit itong puso ko for love, 'di ba?"

Apan miingon si Eugene nga nakasala usab siya nganong loveless siya karon tungod kay sa nakalabay nga mga adlaw puro lang siya trabaho ug wala nay panahon alang sa iyang lovelife.