Nawataswatas nga kagahapon

Sa miaging Sabado sa gabii, sila si Chad Borja ug Dulce (mabasa sa entertainment page sa Philippine Star sa mao gihapong adlaw, Hulyo 3) maoy entertainers sa Teatro Casino diha sa Waterfront Lahug, giangkon sa duha nga may sentimental value nila ang Cebu kay dinhi man sila matawo pila gayod ka tuig ang nakalabay busa, giangkon sad nila nga medyo may edad na sila (si Chad 40 ug si Dulce 43), busa, may mga kanta gyod sila nga dili mapugngan ang ilang mga luha, labi na, kining duha usab ka dinayeg ug mga iladong mga performers hangtod karon, miangkon nga duna sad kono silay mga nawataswatas nga kagahapon dinhi mismo sa Cebu.

Unang mikanta si Dulce, ikaduha pa gani niyang kanta, nanglugmaw na ang mga luha hangtod nga dili na gyod mapugngan ang tubod sa luha gikan sa pag-awit nga "Perhaps Love" ngadto sa "Paano," ug uban pa. Giawit pod niya ang pinangayo kanunay nga nag-ulohan og "Memory" diin, kanunay gyod siyang mokamang sa sawog inig-abot sa usa ka portion diin, sa play nga "Cats" nga siya pod ang lead star isip Grizabela, The Cat" gikanta pod niya ang "Usahay" nga matud niya, gihangyo siya sa banay sa naghimo niini (Nito Gonzales ba to?) nga ibalik ang mga original nga lyrics nga lahi diay kaayo sa bag-ong lyrics karon (sama sa, "nganong gidamgo ko ikaw" inay sa bag-o nga, damgohon ko ikaw".

Una pa lang kanta ni Chad Borja human sa ilang duet, nanglugmaw na ang iyang mga luha ug miingon siya, "takdan man ta aning Dulce uy" pero giangkon niyang siya sad, may nawataswatas nga kagahapon sa Cebu. Si Dulce, sa wapa mapadpad sa Manila, daghang mapait nga kasinatian dinhi sa Cebu ug si Chad, mao usab, labi na ang may kalabutan sa gugma (kono) hinungdan nga hangtod karong angayan na unta siyang maglipay kay malampuson na siya isip entertainer ug negosyante kay siya may tag-iya sa Table 7 diha sa Cebu Business Park, magbaha ang mga luha kon moawit sa mga karaang awit.