Pagtugpo sa musunod nga importanteng banda

Ang pagtukod og usa ka banda dili sayon tungod kay kinahanglan pa nga hashasan ang mga miyembro niini kung haom ba gayud sila nga mahimong residente sa maong kalibutan. Gumikan niini usa ka kanhi miyembro sa bandang "Scream Cebuano Underground Music" o SCUM niadtong 1999 nga si Bimbo Baliguat 27-anyos nga taga Talisay ang naaghat sa pag-umol sa grupo sa banda dinhi sa Sugbo tungod sa iyang nasinati nga kapakyasan kaniadto.

Ang tumong ni Bimbo nga mahatagan usab og higayon ang grupo sa mga banda nga wala pa mailhi nga makabaton og kaugalingong pangalan. Ug ang nahimong tubag niini mao ang Zugbuanong Lumad kon "Zuglu." Sa wala makahibalo ang ilang pagtoo mao nga ang pulong Zuglu usa ka grupo sa banda. Apan sayop sila tungod kay gipasabot ni Bimbo nga usa kini ka kapunungan sa banda nga gustong mopadayag ug mopaambit sa ilang mga talento sa paglaylay sa musika sa ingon makadalit og kalingawan ngadto sa tanan nga mahiligon sa musika.

Sa sinugdanan. "Vurtuso" ang ngalan nga ilang gipatik ngadto sa imahe sa ilang kapunungan apan giusab kini ngadto na sa Zuglu, tungod kay duna nay nakauna paggamit sa maong titulo. Ang Zuglu pormal nga natukod niadtong December 2005.

Matud ni Bimbo nga aduna nay sobra 20 ka miyembro ang ilang organisasyon nga pulos naggikan sa habagatang bahin dinhi sa Sugbo ug sa sunod aduna usab silay plano nga mopahigayon og audition sa mga banda nga naggikan sa amihanan. Ang pagsulod sa organisasyon dili usab sayon tungod kay lagi una kini og audition. Libre ra kini, buot ipasabot walay registration fee. Sa pagkakaron nagpahigayon ang Zuglu south conference ug sa Hulyo niining tuiga gikatakda ang north conference nga pagahimoon didto unya sa mga dakbayan sa Lapu-Lapu ug Mandaue.

Aduna nay daghang "gigs" nga nahimo sa south ug karong petsa 11 niining buwana adunay ipahigayong "Awit ng Kalayaan" diha sa Lawaan Talisay Central market kini ipahigayon diin ang tanang mga banda nga nahisakop sa Zuglu maoy mohugyaw sa mga motan-aw unya.

Sa nasayran ang Zuglu makadaghan na nagpahigayon og mga pasundayag sa nagkadaiyang dapit sa Talisay nga walay bayad ug bugtong nilang kalipay nga makita nga adunay bagang duot sa katawhan ang motan-aw. Si Bimbo mibutyag nga isip organizer sa Zuglu nakabaton siya og usa ka dakong hagit tungod kay siya man mao ang mangita og mga sponsor apan kung ang pondo nga mahipos dili mapaigo, sila mismo maoy magtampo tampo.

Kasagaran itukar sa mga bandang sakop sa Zuglu mao ang reggae, rock ug alternative samtang naningkamot usab sila nga makagama og kaugalingon nilang composition. Ang grupo nagdamgo usab nga sa umaabot makabaton usab sila og album.

Ang mga opisyal sa Zuglu mao sila si Bimbo, Jay Dilan , Web Master ug ang mga staff mao sila si Jr. Baliguat, Sherwin Lopez ug Jason Candia.