Glass of Dirt: Bisrock metalheads

Ang mga rockumentaries nagdokumento kon giunsa nga ang psychedelic rock, European classical music ug British blues, nga gitawag og stylistic origins, naghatod sa pagkagama sa nagkalandrakas nga subgenres sa heavy metal gikan sa death ngadto sa doom, gikan sa folk ngadto sa trash; ug nakakulit og dalan nga mahatod ang panagsambog nga nakapahimugso na usab sa Christian metal, funk, industrial, nu metal ug uban pa.

Ang 1970s nga istilo sa musika nga gitamod sa mga susama sa Black Sabbath, Deep Purple, Iron Maiden, Led Zeppelin ug ang tropa sa mga gitawag og metal maniacs, nakaimpluwensya sa tawong tabunon - ug tuod man nakahatod sa ebolusyon sa Bisrock metal.

Heavy metal music - mao kini ang naglagubo kanunay sa utok nilang hardcore metaller Lawrence "Loloy" Amante (vocals and guitars), headbanger Great "Gege" Englis (drums) ug metalhead Warren Martinez (bass) nga naglangkob sa Bisrock metal band nga "Glass of Dirt".

Ginamit ang impluwensya sa bandang Alice in Chains, Sound Garden, Metallica ug Black Sabbath, ang tulo mipahimugso sa paningog sa Glass of Dirt, ang giingong nag-inusarang heavy metaller sa Bisaya rock music scene.

"Malipayon kaayo mi nga naapil mi sa line-up sa mga bandang Bisrockers. Based on feedbacks sa among mga performances, duna nay nahinangop ug nakadayeg sa kabug-at sa among music nga impluwensiya sa death metal," saysay ni Loloy.

Ang Glass of Dirt nagdala sa bansagong "bug-at". Sa termino sa musika, nagpasabot kini og "thick, heavy, guitar-and-drums-centered sound typical of metal music" nga mogamit og "highly amplified distortion" sa gitara, sama sa buhaton ni Warren sa pagtukar niya og "repeated riffs and pounding rhythms" nga gitimbangan sa "typical intentional gruff sounding vocals" nga gipahaum ni Loloy, ug sinambugan sa makapalayat-layat nga drumplay ni Gege.

Sa tuig 2005, sa dihang diha na ang Bisrock music genre apan dili pa lang susama karon nga pwerte nang paka-paka ug piti-piti gumikan sa kasibaw nga namugna niini, ang pundok nakabuhat na og album nga may ulohang "Digest". Aduna kini 12 ka mga kanta, pito niini nasulat sa Iningles, upat sa Tinagalog, ug usa sa Sugbuanong pinulungan nga may titulong "Dragon".

Nahitabo kini human maghugpong ang mga pwersa nilang Gege sa "Onion Glass" ug Loloy ug Warren sa "Men on Patrol", mga banda nga aktibo sa panahon sa Scream of Cebu Underground Music balik sa katapusang mga yugto sa dekada 90.

Ang "Digest" gisumite sa 93.1 Smash FM sa pamasin nga kon dili man tanang kanta matukar, ang "Dragon" makabugwak og nagkayo-kayong pagtagad gikan sa mga tigpaminaw. Apan pakyas ang Dragon nga maapil sa playlist. Bisan pa man tuod og wala'y lyrics nga binastos o pamalikas ang maong kanta, gibalibaran kini tungod sa gihulagway niining sitwasyon sa paggamit og ginadiling drugas.

Apan sa tinood, ang Dragon matud pa ni Loloy, nga maoy naghablon sa mga pulong niini, usa ka atake sa mga nangaungo na's makapakuyaig nga bisyo. Didto sa imong kuwarto/naglikit ka og tissue/foil sinaw kaayo/pagbubo mo way yabo/Dagway nimo mura og dragon/Ang imong lawas kabungkagon/Siga na kaayo, kalimutaw nimo/Hait na kaayo, tinutukan nimo..."

Midungag si Loloy nga nahimuot siya sa sangputanan sa pag-ban, "Ang naka-ironic lang gyud kay during our live performances, mas dali matiman-an sa mga tawo ang Dragon nga walay airplay sa radio kaysa kadtong mga kanta nga gipatukar sa radio. Duna man gyud gani mopalit sa among CD aron lang gyud madungog ang Dragon."

Dinhi na nakaamgo ang Glass of Dirt sa impact sa mga kanta nga Binisaya.

"Mao gyud na ang nag-propel namo karon nga mo-prioritize gyud mi og Binisaya nga kanta unya last option na lang nang English ug Tagalog," apas sumpay ni Warren sa gibuhiang pamahayag sa iyang duha ka bandmates.

Alang sa dungag nga kahibalo, e-mail [email protected] o bisita sa http://glassofdirt.multiply.com. Mapalit ang "Digest" sa Manu-Ent sa E-Mall ug JB Music sa SM City.