Artistang wanted

Ang inyong makita sa hulagway, matud pa ni direk Philip Tariman, usa sa labing maayong artista dinhi sa Sugbo. Gihinganlan kono siya og Jun, pero hangtod karon, wa sad makaseguro si Philip ug ang iyang assistant nga si Jun Dee Delima, kon unsay tinuod nga apelyido, Aviancia o Avancia ba. Matud pa usab ni Pakol (ambot unsa say tinuod nga ngalan niining artistaha kay ang tanan mohingan man lang niyag Pakol, bisan sa iyang mga salida), katapusan kono niyang nakit-an si Jun nga nagpuyo sa usa ka barangay sa may utlanan sa Liloan ug Compostela. Pinaagi sa pagtabang ni Hercules Yuson ug sa iyang mga anak nga production assistants ni direk Philip nga sila si, June Philippe Tar, Chris Yan ug Win Gardo, gisugdan ang pagpangita kang Jun apan pakyas gayud kini. Hinungdan nga pinaagi dinhi sa Banat News, gipakita namo ang iyang hulagway, basin na la'g may nakaila kaniya, aron matoltolan ang iyang gipuy-an. Basin na lang pila'y paad, makabasa si Jun niini, o ang iya bang mga kaparyentihan, kapuso, kapamilya, ka tong-its, kainom ug uban pa, magpakita siya kang direk Philip Tar, sa CCTN o sa assistant ni Philip nga si Jun Dee Delima [sa iyang studio (Delima Entertainment sa Galaxy, Maguikay, Mandaue City). Mahimo sad niining tagsulat [2594294 Cell 9154366608]. Laing gustong ika-istorya ni direk Philip mao ang beteranong actor nga si Lloyd Maslog, kay kini kono silang duha, may angay'ng i-explain kang direk.