Valerie dili una manguyab

Si Champ, bokalista sa sikat nga bandang Hale maoy crush ni Valerie Concepcion diin ultimo paglitok lang sa ngalan niini, magkisikisi na ang dalaga dayong buhakhak og taman.

Ang dalaga kinsa regular karon sa Majika sa GMA-7 isip Ombra, mibutyag hinoon nga dili una siya mag-uyab-uyab tungod kay prioridad niya ang iyang pagbalik og artista ug ang kapin sa tuig na niya nga anak.

Si Valerie kauban ni Joseph Bitangcol niadtong Sabado nga mipasundayag didto sa Bogo Sports Complex alang sa katapusan pagbola sa Gaisano Main, Countrymall, Gaisano Balamban ug Gaisano Bogo's "A Million Thanks Promo."

"Hindi pa ako ready to have a commitment kasi hindi pa rin ready ang parents ko. Feeling ko ha, kasi there was this guy na, alam mo yon okay siya, friend ko siya, tapos nung tinanong niya ang mom ko kung pwede ba niya akong ligawan, pero sa reaction niya (mommy) hindi pa siya ready. So ako nirespeto ko kung ang desisyon niya na yon. So huwag muna, crush crush na lang muna," pag-angkon niya.

Si Champ nahimamat ni Valerie atol sa concert ni Jennylyn diin matud pa niya sa dihang hapit na mahuman og kanta ang banda nagdali siya pag-adto sa backstage aron ma-meet sa personal ang guapo nga bokalista.

Gawas kang Champ crush usab niya ang usa sa duha ka bokalista sa Sponge Cola apan iyang giklaro nga gumikan ra kini sa ilang musika ug wala nay lain pa. Pong pa niya, kaniadto man gong high school pa siya, dream niya nga makauyab og lalake nga makamaong mokanta ug mogitara aron romantiko ang ilang panag-uban.

"Si Sponge Cola wala yon, parang gusto ko lang siya because of his music. Si Champ? He, he, he, hindi ka mi textmate, parang minsan lang as in super minsan lang. Nagkaka text lang na how's your day or good night hindi naman yong- oh kumain kana? Wala," pagklaro niya samtang nagsigi og buhakhak.

Kon kahinumduman, si Valerie nawala balig pito ka buwan sa showbiz human siya mimabdos ug nanganak og batang babaye. Pangasaw-on unta siya sa amahan sa iyang anak, apan wala mutugot ang iyang ginikanan tungod kay labihan pa niya ka bata sa pangidaron nga disisiete anyos.

Sukad niadto wala na niya makita pagbalik pa ang amahan sa iyang anak, diin wala na usab silay communication. Miingon si Valerie nga wala pa siya masayod unsaon niya pagpasabot ang iyang anak sa higayon nga mangutana na kini hain ang iyang amahan.

"Naisip ko yon na talagang magtatanong yon. Wala pa akong final decision kong anong sasabihin ko sa anak ko. Hindi ko pa siya napag-isipang mabuti dahil ini-enjoy ko muna ang pagka baby niya."

Subling namahayag si Valerie nga wala siya magbasul sa nahitabo niya gumikan kay nasayud siya nga ang tanan nahitabo tungod kay dunay rason ug dunay giandam ang Ginoo alang kaniya.

" I realized na siguro non, kaya ako naligaw ng landas kasi napalayo ako sa Kanya. So ngayon, unang una, thankful ako na I'm here, I'm back tinanggap akong muli. I know na it's because of Him. Syempre tinanggap ako ng parents ko, yon yong familya na ibinigay niya sa akin so na-realize ko ang mga bagay na ganyan. That made me closer to Him," seryosong pamahayag ni Valerie.

Sa pagkakaron inanay na nga mibalik ang kahumot ni Valerie sa showbizlandia diin napuno siya sa imbitasyon alang sa mga provincial shows. Gawas sa Majika, apil usab siya sa digital film nga giulohan og "Pitong Dalagita" ubos sa Octo Arts Films. Samtang kon duna siyay igong panahon tua siya magyampungad sa Ilorde Boxing Gym, hinungdan nga sexy na usab karon si Valerie. - Ryan Mark

(Alang sa gustong makabati sa mga agik-ik ni Valerie atangi ang recorded interview kaniya, sa OkRyan-alas tres ngadto sa alas kuwatro sa hapon sa radio dyLA 909khz).