Bunga sa usa ka damgo

"You made it happen " linya kini sa awit sa usa ka batan-ong Sugbuanon nga nihinay-hinay nang mikulit sa iyang ngalan sa local music industry ug gani naghaguros na usab ang mga kasikas nga gimugna sa iyang ngalan didto sa kaulohan karon. Ug sa kainit sa pagdawat sa mga Sugbuanon sa maong awit, maingun tang "she made it happen" na gayud. Ila-ilahon ta ang tingog nga nagpalanog niining maong awit, walay lain kondili si Maria Donna.

Nahimugso ug nagdako sa barangay Basak, dakbayan sa Sugbo si Maria Donna mapaubsanong miingon nga gikan gayud siya sa simple nga pamilya. Siya kamagwangan sa tulo ka managsuon ug bugtong anak babaye.

Matud pa niya sais anyos pa lamang siya hilig na niya ang pagkanta apan tungod kay maulawon man siya wala siya misalmot sa mga singing contest sama sa Pinoy Pop Superstar ug Star in a Million. Si Maria Donna nga nahinabi sa programang OkRyan sa dyla niadtong nakalabay nga Martes sa hapon, miingon nga ang iyang iyaan nga ganahan motan-aw sa iyang mga pag-umangkon nga mopasundayag sa entablado maoy nagdasig kanila nga pahimuslan ang ilang nagkadaiyang potensyal sa musika.

Sa pagtapos niya sa Basak Elementary School, nasulod siya sa napulo ka labing maayo nga mga tinun-an hinungdan nga nakahigayon siya pagtekang ngadto na sa University of San Jose Recoletos high school human siya mipasar sa examination aron mamahimong Punla Scholar nga maoy proyekto sa negosyante ug pilantropo nga si Norberto Quisumbing. Didto sa USJR high school naugmad ang talento ni Maria Donna sa pagkanta nga maoy naghatag og dalan nga magkaila sila ni Dr. Milagros Espina, nga kaniadto maoy nagdumala sa USJR Dramatics Guild and Cultural Ensemble. Sanglit nakadayeg si Espina sa talento ni Maria Donna, diretso na siya nga nasulod sa maong kapunongan sa dihang mikuha na siya og kurso nga Bachelor of Arts in Mass Communication sa maong unibersidad niadtong tuig 1997. Sa kolehiyo wala siyay bayad sanglit usa man siya ka Amparito Lhuillier scholar.

Sanglit tinood nga dunay talento nga sarang ikabuga, dali nga naila ang tinun-an nga si Maria Donna. Mapaubsanon ug dili dakog ulo si Maria Donna, hinungdan nga sa iyang mga classmates ug higala siya giabibahan, gihangop ug gipangga. Aktibo man tuod siya sa Dramatics, wala usab niya biyai ang iyang pagtuon diin kutob sa mahimo dili gayud siya mo-absent. Utukan usab si Maria Donna, dili mapalabi labihon ug labaw sa tanan dili mangilog og esena. Gani bisan humot na ang iyang ngalan sa tibuok tunghaan, mauwawon gihapon siya.

Apan miabot ang higayon nga kinahanglang biyaan ni Maria Donna ang iyang pagtuon human miabot ang tanyag aron motrabaho isip singer didto sa gawas sa nasud. Tuig 1999, milupad siya paingon ngadto sa Macau diin sulod sa tulo ka tuig, gipaambitan niya ang iyang talento sa mga langyaw.

Niadto lang 2001 mibalik sa nasud si Maria Donna, ug sukad niadto nahimo siyang lead vocalist sa bandang One in Him. Sa nagkalain-laing dapit sa probinsiya napadpad ang nahisgutan nga Christian-based band aron paambitan ang maayong mga buhat sa Diyos pinaagi sa musika. Wala magdugay nakaplagan ang potential ni Maria Donna aron mamahimong sikat nga soloist.

Maria Donna, ang self-titled album ang nagtugpo sa singing career sa maong Sugbuanon. Niadto lang Disyembre sa miaging tuig nalusad ang maong album ug karon misikat na ang duha sa napulo ka awit niini- ang "You made it Happen"nga carrier single ug ang "Pastilan Bay," nga naglanog lanog na sa Kabisay-an ug Mindanao.

Dili kahibudngan nga nakadapit og pagtagad ang nindot nga tingog ni Maria Donna gumikan kay sa wala pa siya hingpit nga gihangop sa publiko, gitagna na kining daan sa banggiitang composer/singer nga si Jose Mari Chan. Ang duruha nga nag-duet atol sa concert sa nauwahi dinhi sa Sugbu niadtong Disyembre, miingon nga si Maria Donna mao ang "next big thing" dili lang dinhi sa atong nataran kundili sa lukop nasud.

"I was so honored and proud atong panahona but gikulbaan sad basin mayabag ta," pong pa ni Maria Donna atol sa follow-up interview sa Banat Hugyaw. Miangkon siya nga kon duna may nausab sa iyang kaugalingon karon, kana mao nga dili na susama kaniadto nga mahimo ra siyang maglakaw-lakaw nga magbinugoy ug walay make-up.

"Ingun ani ko bugoy, dili class apan dili anti-social. I'm just true to myself. I am what I am," matud pa niya sa iyang tinuod nga pagkasiya bisan pa man og daghan nang makaila kaniya.

Sa pagkakaron busy ang dalaga sa pagpromote sa iyang album sa nagkalain-laing dapit sa Visayas ug Mindanao. Ug matud pa niya basin sa mga umaabot nga adlaw hingpit na niya nga masakop ang imperial Manila.

Naghuwat usab ang dalaga nga mahimong pinal ang concert niya kauban sila si Pilita Corales ug Elizabeth Ramsey sa Tacloban City. Ug sa dili pa mahuman ang tuig nagplano ang SARUA, Cebu-based recording company diin under contract ang dalaga, nga malusad na usab ang ikaduha niya nga album.

Ug basin sa mga umaabot nga mga adlaw makurat nalang ta nga makauban na unya niya ibabaw sa entablado sila si Regine Velasquez ug Lani Misalucha kay matud pa niya "I have a dream" nga buot niyang kab-uton.