'White star' Zsarie

Sa didto pa siya sa sabakan sa iyang inahan, kanunay siya nga papaminawon og love songs pinaagi sa pagtapion og headphone ngadto sa tiyan sa iyang mama. Sa dihang nagpangidaron siya og walo ka buwan, kahibaw na siya sa tono sa kantang "If We Hold On Together," ni Diana Ross. Nianang dos anyos na siya, nagsugod na siya pagkanta sa mga awit ni Whitney Houston sa matag higayon nga dunay selebrasyon sa ilang pamilya. Nianang mosunod nga mga tuig kanunay na siya nga dapiton aron mokanta sa panahon nga dunay mga ilusad nga bag-ong produkto o ba kaha dunay birthday party.

Karon nga nagpanuigon na siya og disisiete anyos, lain na usab ang iyang gikabuangan ug kana mao ang mga opera songs. Karon pa lang inanay na nga mihumot ang iyang ngalan, diin kon itugot sa Ginoo, magpahigayon siya sa iyang unang concert didto sa kaulohan karong Disyembre ning tuiga.

Siya si Izarzuri M. Vidal, anak sa inilang pintor nga si Mar Vidal. Sama sa iyang ngalan nga nagkahulogan og "White Star" sa pinulongang Espanyol, si Zsarie sumusubang nga bitoon nga ugma damlag maghatag na usab og laing garbo sa Sugbu. Sa pagkakaron hinoon, maoy buot niya nga tutukan sa iyang atensyon ang iyang pagtuon sa kursong Business Administration sa University of San Carlos.

"I have to sacrifice everything for this. But now dili sa ko muondang. Ginoo ra gyuy magbuot. Ganahan man gyud ko mahuman," pong pa niya dihang nahinabi sa Banat Hugyaw niadtong Miyerkules sa buntag.

Misubang ang mahayag nga ugma alang kang Zsarie dihang mikanta siya niadtong Abril 30, sa Camp Z atol sa birthday sa negosyante nga si Peter Collin. Niadtong tungura ang mga higala ni Peter gikan sa nagkadaiyang bahin sa kalibutan mitambong sa maong okasyon nga gisalmutan usab sa mga inilang personalidad sa Sugbu, usa na kanila ang socialite nga si Amparito Lhuillier. Nakugang ang mga bisita sa ilang pagkadungog kang Zsarie tungod kay dili sila makatuo nga sa iyang linghod nga pangidaron maayo na siya nga mokanta og opera songs diin lareno usab niya nga pagkayamyam ang mga lyrics niini nga gimugna gikan sa pinulongang Pranses ug Italian.

"Katong sige gyud og attend og opera didto sa London, na -shock lagi kay sa kagamay sa atong province unya dunay singer nga ilang gi-compare sa mga taga London almost perfect na gyud kuno, the way she speaks Italian and French. Wala mana siya nag-study so na amaze sila," pag-asoy sa iyang amahan nga si Mar.

Nagsugod ang pagkahilig ni Zsarie sa opera songs sa dihang nahimo siyang Sister Agatha sa play nga "Sound of Music" sa St. Dominic Learning Center diin siya mitapos sa high school last year. Misamot ang iyang interes dihang nakakita siya sa salida nga "Phantom of the Opera" sa susamang tuig. Sukad niadto nagduki duki na siya sa mga opera songs sa Italya ug France pinaagi sa Internet. Niining tungura magbantay na siya unsaon paglitok ang mga langyaw nga pulong ilabi na kon magkanta.

"Usually nag-observe kog mga singers, how they pronounce. Unya how they internalize and the movement. Daghan kaayo kog kat-onon ug obserbaran," pagtin-aw ni Zsarie. Niadto usab nga party, diretso siya nga gitanyagan ni Madam Amparito nga mopasundayag atol sa fashion show sa iyang anak ug inilang designer sa Hollywood nga si Monique Lhuillier. Ang fashion show mahitabo didto sa kaulohan karong umaabot nga Nobiyembre diin gikatakda nga magduet si Lea Salonga ug Zsarie. Matud pa sa atong bida, 'dream come true" ang maong oportunidad tungod kay idolo niya ang sikat nga international performer tungod sa ka maayo niini ilabi na sa mga plays nga Miss Saigon ug Side by Side. Karong Nobiyembre usab gikatakda siya nga mopasundayag atol sa ASEAN Summit dinhi sa Sugbu. Ug sa higayon nga mahimo nang pinal ang negosasyon tali niya ug sa usa ka Manila based talent manager, pormal unya siya nga ipaila pinaagi sa usa ka solo concert karong Disyembre didto sa kaulohan.

Hugyaw gayud ang batan-on nga si Zsarie. Tiaw mo kana nga wala diay siyay formal training tungod kay dihang gipalista siya sa iyang amahan sa A. Salonga Music Center aron unta makabaton siya og voice lessons, giingnan sila nga dili na siya kinahanglan nga mutungha pa gumikan kay makamao na siyang mokanta. Gikinahanglan lang nga kanunay siya nga mag-praktis aron ma-ugmad og maayo ang iyang talento. Busa kanunay siya nga magbansay bansay pinaagi sa pagkanta ginamit ang karaoke sa ilang panimalay, nga gikahimuot og maayo sa ilang mga silingan tungod kay sama sila nga naminaw og compact disc sa mga sikat nga opera singers, hinungdan nga bation sila og tumang kahayahay sa ilang mga galamhan. Dili usab siya mahimong moinom ug mokaon og bugnaw labaw na dili mahimo nga mahago siya og maayo.

Matud sa iyang amahan, hayan nakuha ni Zsarie ang iyang nindot nga tingog gikan sa iyang inahan nga si Gwendolyn kinsa sakop sa San Jose Recoletos Band kaniadto. Miingon usab si Zsarie nga nindot og tingog ang iyang mama "gasa gikan sa Ginoo" ang iyang talento busa ang pagbuot sa Diyos maoy matuman ilabi na karon nga nagsugod na og arangkada ang iyang bitoon.