Ate Vi napilde sa rating

Gipilde ni Jean Garcia si Ate Vi sa rating niadtong Huwebes? Kini suma pa sa mga migawas nga taho nga mas taas ang rating sa "Magpakailanman" kaysa "Maalaala Mo Kaya".

Si ate Vi ang bida sa anniversary presentation sa MMK diin second episode na sa estorya sa usa ka inahan nga dunay special child ang gisalida niadtong Huwebes.

Si Jean usab ang bida sa Magpakailanman, sa papel sa usa ka inahan kansang mga anak inanay nga namatay tungod sa kakuwang sa antibodies.

Suma pa sa mga nakakita nga pang pelikula ang MMK ni Ate Vi busa ang ABS-CBN, nakahunahuna nga maggama og DVD copy.

Walay pirated copy

Hugtanong gipanghimakak ni OMB Chair Edu Manzano ang taho nga duna nay pirated copies sa kontrobersyal nga pelikulang Da Vinci Code nga nagkatag karon sa mga aseras dinhi sa nasud.

Sa report sa PangMasa, si Edu namahayag nga wala pay print ang nahisgutan nga pelikula busa imposibli nga duna nay pirated copies, apan kon duna man ugaling hayan giilad ra sa mga namaligya ang publiko. Sure siya nga wala pay available prints dinhi sa nasud ang nahisgutan nga movie ni Tom Hanks ug gani matud pa niya nga posibli nga excerpts gikan sa promo material ang unod sa maong DVD o gi-download gikan sa documentary program sa National Geographics.

Apan mga tinubdan sa PangMasa ug Banat Hugyaw hugtanong namahayag nga illegal copy na gayud sa maong pelikula ang ilang nahuptan.

Perteng yabaga?

Gisaway sa mga himantayon ang duha ka kanhi teen housemates nga sila si Niña Jose ug Aldred Gatchalian gumikan kay labihan ka yabag sa mga tingog niini dihang nanganta sa ASAP niadtong Domingo.

Miingon ang mga himantayon nga angayan nga gipailawom una sa workshop ang mga nahisgutan una gipalugwa sa ASAP.

Nagyawyaw ang mga nakabati kanila ni Niña ug Aldred tungod kay matud pa gi-murder as in gipanamastamasan nila ang kanta nga "Crazy for You."