Pagpangandam alang sa ugma

Usa na ka tuig ang relasyong Karylle ug Dingdong Dantes ug sulod niining maong gidugayon, mas milig-on ug mas milipang ang ilang panaghigugmaay. Gani naglaraw si Karylle nga mobalik og tungha tungod kay duna silay plano ni Dingdong nga magtukod og pre-school. Kining maong kasayuran gibutgyag ni Karylle ug Dingdong mismo sa exclusive interview sa Banat Hugyaw ug Freeman Entertainment niadtong Sabado sa panihapon didto sa balay ni Mandaue City Mayor Thadeo Z. Ouano.

"I'm going back to school and take up education kasi we have plans of putting up a pre-school. Nuon pa naman kasi gusto ko talagang kumuha nang kurso na yan pero sabi ng daddy ko walang pera dyan sa pagtuturo," pong pa ni Karylle nga nagkatawa.

Tungod sa maong rebelasyon, wala kapugngi sa Banat Hugyaw ang pagpangutana kon hain na ba sila nga ang-ang karon sa ilang relasyon nga daw seryoso naman sila nga nagplano alang sa ilang ugma. Nagkaduol na ba ang kasal?

Nagkinidhatay una silang duha, dayon miingon si Karylle nga "siya na naman ang tanungin ninyo," unya mibuhi og tam-is nga pahiyom ngadto sa iyang hinigugma nga si Dingdong. Apan nagpaka-aron ingnon si Dingdong nga wala makabati sa pangutana dayong ingon nga wala pa silay laraw nga magminyo ug maoy ilang prayoridad ang mamahimo epekto sa ila unyang pagatukoron nga tunghaan ngadto sa ilang mga estudyante. Matud niya buot lang gayud nila nga makatabang nga walay gipaabot nga bawos.

Samtang sa pangutana kalabot sa kasal, si Karylle miingon " wala lang siguro silang matanong o masulat kasi first anniversary namin," nga ang gipasabot ang mga tigbalita sa kaulohan nga maoy unang mipalutaw sa posibilidad nga magminyo na silang duha. Matud pa niya magpaabot pa siya og lima ka tuig karon nga 25-anyos na siya, una siya modesisyon nga magminyo.

Karon nga nahuman na ang "Encantadia- Pag-ibig Hanggang Wakas," buot ni Karylle nga hingusgan na ang iyang singing career pinaagi sa paglibot sa nagkadaiyang mga malls ug bars aron pag-promote sa iyang labing uwahi nga album. Gani iyang gipahibawo nga mobalik siya dinhi sa Sugbu ugma alang sa "Faces of Love" concert diha sa Waterfront Hotel Lahug kauban ang iyang inahan nga si Zsa-zsa Padilla, Gary V. ug Paolo Valenciano.

Samtang si Dingdong miingon nga karon nga SOP na lang ang iyang show matag Domingo sanglit nahuman na man usab ang 'Huwag Kukurap," paningkamutan niya nga mahuman na sa iyang pagtuon isip estudyante sa kurso nga International Studies sa Ateneo de Manila University. Matud pa niya karon nga duna na siyay libre nga panahon, kanunay na sila nga mag-uban ni Karylle nga mag-jogging ug mag-exercise sa gym.