Hugway nga panagna

Walo sa napulo ka mga kandidata nga gitagna sa Banat Hugyaw nga masulod sa Top 10 sa mabulokon nga Miss Mandaue 2006 ang natinood gayud, upat kanila nasulod sa Magic 5 diin ang usa maoy nakoronahan.

Siya walay lain kondili si Nicole Schmitz, ang disisiete anyos nga Filipina-Canadian kinsa mao usay midaug isip Best in Costume, Miss Olive-C ug Miss Cebuana Lhuillier.

Ang candidate number 12 nga si Carlisle Santos maoy first runner-up, nga gisundan nila ni Sheena Cubillo (2nd runner-up), Princess Stephanie Lalwani (3rd runner-up) ug Kirstie Joan Babor (4th runner-up).

Kahinumduman nga lakip sa atong gitagna nga masulod sa top 10 mao sila si Monique Carole de Leon, Richelle Therese Borja, Isadora Maidee Gonzales, Maria Victoria Salazar, Kathy Lyn Atuel, Phoebecates Perez, Babor, Lalwani, Cubillo ug Schmitz. Si de Leon ug Atuel maoy nahagba ug ang napuli kanila mao sila si Roxanne Cabañero ug Santos.

Si Schmitz kinsa sakop sa Ozar models nga gidumala ni Danny Booc, namahayag nga wala gayud siya magdahum nga siya maoy modaug apan iya lang gilingaw ang iyang kaugalingon ug gihimo ang tanan alang sa korona.

"I just tried to relax and enjoyed the moment. I did not have expectations because I might just be disappointed in the end," pong pa niya sa dihang nahinabi sa mga tigbalita nga nagsul-ob na sa korona isip Miss Mandaue 2006.

Ang final question mao nga unsaon nila paghulagway ang haom nga mahimong Miss Mandaue, diin gitubag kini ni Schmitz sa pag-ingon nga kinahanglan nga siya sulondon sa uban ug makahimo pagtuman sa iyang mga katungdanan, disiplinado ug makamao makig-atubang sa katawhan.

Kani ang unang korona ni Schmitz sukad siya nagsugod pag-apil sa mga indigay sa kaanyag niadtong nakalabay nga buwan. Hinoon usa siya sa lima ka mga batan-on nga ipadala karong buwana didto sa kauluhan alang sa Miss Teen Philippines. Nahimo usab siya nga first runner-up sa labing una nga Miss South Pacific nga gipasiugdahan sa Sugbu Films Production niadtong Abril 27.

Samtang si Santos maoy nakoronahan nga Miss Bevon 2005 ug niadtong Sabado nakadaug usab siya og minor awards sama sa Best in Costume ug Best in Swimsuit.

Laing mga nagpakadaug og minor awards mao sila si Anais Nuñeza (best in talent), Maria del Carmen Garcia (Miss Zen Zest), Carielyn Encierto (Darling of the Press), Imelda Remeticado, (Texters Choice), Perez (Miss Friendship), Lalwani (Miss Photogenic ug Miss Kutis Renew Placenta), de Leon (Best in Costume ug Miss Chic) ug Gonzales (Best in Gown).

Si Dingdong Dantes maoy segment host samtang mikanta usab og duha ka mga awit ang iyang uyab nga si Karylle, nga maoy nakapasamot sa kamabulokon sa indigay karong tuiga sa direksyon ni Doy Arradaza ug pagpasiugda ni Mdm. Emmarie "Lollipop" Dizon Ouano. - Ryan Mark Mark