Snooky ug Alma nagpabadlong

Natarantar ang staff sa "Sharon" human kalit lang nga gi-cancel nila ni Snooky Serna ug Alma Moreno ang gikatakda nga taping alang sa episode nga ipagawas unta karong gabii.

Nasayran sa PangMasa, nga didto na si Megastar Sharon Cuneta nagpaabot sa studio sa ABS-CBN alang unta sa interview sa dihang kalit nga mibalibad ang duruha nga dili sila makatambong.

Tungod niini, nakapangutana ang mga himantayon unsay gikalingawan karon og maayo nila ni Snooky ug Alma nga wala man untay nabalita nga projects nga ila karong gihimo?

Gumikan usab sa maong pagnilabad sa duruha, napugos na lang ang staff sa Sharon, pag-usab sa original nga plano diin imbes ang interview nila kang Dawn Zulueta maoy ipasalida karong Mother's Day sa May 14, mao na lamang kini ang ilang ipakita karong gabii.

Sa labing unang higayon ipakita ni Dawn sa telebisyon ang ilang anak ni Anton Lagdameo, nga si Jacobo Antonio ug sa labing unang higayon usab misugot si Anton nga ma-interview siya ug ipakita usab ang ilang balay nga tua mahimutang sa Davao.

Relasyong Vic ug Pia tukion

Daghan ang nakuwangan sa interview ni Pia Guanio kang Vic Sotto sa Chika Minute niadtong Biyernes sa gabii kalabot sa intriga nga nakig live-in na ang naulahi kang Julia Clarete.

Pong pa ni Julia "bossing, nagli-live-in daw tayo," busa komedyang tubag ni Vic mao nga "magkano ang ginastos mo para maibalita iyon?" Nangatawa lamang sila tungod kay matud pa dili tinood ang maong taho.

Sa issue nga sila na si Vic ug Pia ang dunay relasyon, ang pangutana ni Vic ngadto sa TV host mao ni,"Ano raw ang ibinigay ko sa iyo, condominium, kotse, sakit ng ulo?

Walay tubag si Pia niini. Apan nasayran sa PangMasa nga ang kinatibuk-ang interview ipakita sa S-Files karong hapon aron mahatagan na og katin-awan ang tanan sanglit matud pa nagkagrabe na ang maong isyu ug gani misampot naman sa pagtumaw sa taho nga tangtangon na si Pia gikan sa "Eat Bulaga" tungod sa relasyon nila ni Vic.

Keanna Reeves show

Lahi og istilo ang actor nga si Mon Confiado tungod kay tiaw mo ka na nga nagpatawag pa kini og mini-presscon aron lang ibutyag ngadto sa publiko unsa ka maayo nga higala ang komedyante nga si Allan K.

Nasayran sa PangMasa nga nagsugod ang tanan sa dihang nahibaw-an ni Mon nga magpatukod og branch sa Klownz didto sa Cainta si Allan K. diin duna usay branch sa 22nd Street ang aktor didto.

Tungod niini mihangyo si Mon kang Allan nga kon mahimo dili na lamang niini ihinayon ang plano nga magpatukod og Klownz branch didto sa Cainta tungod kay mao kini ang labing sikat karon nga comedy bar busa sigurado nga maapektuhan gayud unya ang kitaon sa 22nd Street.

Na-touched si Mon dihang nanawag gayud kaniya si Allan K ug miingon nga, "usapang lalaki, hindi na ako magpapatayo ng Klownz sa Cainta."

Suma pa nga nakasabot si Allan sa kabalaka ni Mon nga kon mahinayon ang Klownz hayan daghan ang mawad-an og trabaho sa mga empleyado sa 22nd Street.

Samtang karong May 16 & 17, si Keanna Reeves ang guest performer sa branch sa 22nd Street dinhi sa Cebu diin gipaningkamutan pa nga madala usab dinhi ang uban pang mga taga-"Eat Bulaga."

Gawas sa negosyo, busy usab si Mon sa iyang pag-artista diin tulo ka mga pelikula karon ang iyang nahuman na sama sa "Sukob" sa Star Cinema, "Manay Po" sa Regal Entertainment ug "Pacquiao" sa FLT Films ug Star Cinema.

Duna usab siyay himoon nga digital film sa direksyon ni Eddie Romero, ang "Faces of Love" with Christopher de Leon ug Angel Aquino diin siya maoy modala sa papel sa usa ka bayot. First batch sa Pinoy Pop, hupas?

Daghan ang nahibong nganong karon pa gipagawas sa GMA Records ang album sa mga sakop sa first batch sa Pinoy Pop Superstar nga sila si Brenan, Charmaine ug Michael o BCM nga unta usa naman kini katuig nga nahuman.

Ang mga himantayon miingon nga hayan gipagawas na lang ang maong album aron dili matawag nga hupas na ang kasikat sa nahisgutang mga singers.

Hinuon daghan ang giganahan nga maminaw sa initials nga BCM, tungod kay mura kinig sandwich nga 'bacon, cheese ug mayonaise' apan nanghinaot usab sila nga dili kini mapan-os hinonua mahalin kini.

Samtang usa ka taga GMA-7 mihagawhaw niining maong linya ngadto sa PangMasa "for sure itong 2nd batch, igagawa kaagad ng album 'yung mga talunan kasi mas magaganda mga boses nila kumpara sa 1st batch."