Wala damhang bug-at nga lakang sa Stonestomp

Kampeyon sa nahitabong Battle of the Bands Showdown nga gipasiugdahan sa Boss Grill diha sa Mango Avenue niadtong 2004, ug napiling kampeyon na usab sa "Upon This Rock" sa sangka sa mga banda sa Mandaue City Sports Complex sa nakalabay nga tuig, ang Stonestomp naningkamot na usab sa pagdaug og usa ka luna sa kahanginan alang sa ilang musikanhong mugna - ang "Wala Ko Magdahum", usa sa tulo ka mga kanta sa ilang Extended Play album.

Ang kantang "Wala Ko Magdahum" gihan-ay sa lead guitarist sa pundok nga si Evert Sestoso. Apan matud pa ni Evert ang sugilanon nga naglimin sa maong kanta mao ang kasinatian sa gugma'g kinabuhi sa ilang bokalista nga si Morris Aniñon.

Ginaingon nga gi-internalize ni Evert ang maong kasinatian ni Morris aron mapalutaw ang emosyon diha sa mga linya sa kanta ug sa mismong melodiya niini: "Ako usa ka tambay nga nahigugma kanimo inday. Kalami sa akong gibati nga kita nagkasinatiay/apan wala ko magdahum nga nabugnaw ka na karon/ kalit lang nahanaw paglabay sa panahon."

Kining maong track sa ilang EP album nakakudlit na usab og pagtagad, basi sa mga requests gikan sa mga tigpaminaw sa 93.1 Smash FM, sa tulumanong "YourVoice, YourChoice Tingog Kabataan" human duola sa pundok si DJ Ram Dizon aron i-sumite ang usa ka sampler nga may tulo ka kanta - ang "Tigpatuman", "Korikong", ug ang "Wala Ko Magdahum".

Gawas ni Evert ug ni Morris, ang Stonestomp gilangkoban nilang Kenneth "K-Noy" Pacubas isip rhythms guitarist (IT student sa Cebu Institute of Technology), Daryll Cerilla sa drums (tinun-an sa Don Carlos Gothong Memorial High School), ug John Lester "Lepard" Pardillada sa bass (Commerce - CIT). Si Morris nga vocalist social work ang educational background, University of Southern Philippines; samtang si Evert gradwado sa Commerce sa CIT ug nagtrabaho sa ETJ Finance Corporation.

Ang Stonestomp nga ang buot ipasabot "bug-at nga lakang" naporma sa tuig 1996 sa dihang ang kasagaran sa sakop niini ana-a pa magtungha sa high school. Ang orihinal nga mga sakop niini mao silang Mario Baculi (vocals/guitar), Evert (lead guitar), John (bass), ug Eric Acebis (drums). Ang mga mosunod nga mga katuigan nakasaksi sa pag-apil ug pagbiya sa mga miyembro niini sa nagkadaiyang mga rason.

Niining tungora, nanlimbasog ang Stonestomp nga makakawhat sa pagtagad sa masa, pinaagi sa ilang kantang "Tigpatuman" nga usa ka pagtuki sa papel nga gihuptan sa mga tigpatuman sa balaud sa atong katilingban. Si Morris madungog nga mibirit sa linyang "kita mo ba ang kasakit ug among mga singgit/ang pahiyum ug katawa luyo sa problema/singot ug dugo nga among gipuhonan/para sa kaugmaon imong giusikan. Tigpatuman sa kalinaw kanunay lang kaming naglantaw/pasagdan bang mahanaw ang paglaum nga among gihandom/Asa ka karon igsoon, naglibog ka ba ug nabalaka/kahadlok mo wagtanga/ang kahayag imo rang makita."

Ang gibug-aton sa dugukan sa primerong track sa ilang album gisundan sa usa ka kanta nga nihubit og usa ka kataw-anan nga sugilanon may kalabutan ang "Korikong", usa ka matang sa sakit nga nakahatag og kakatol sa panit sa katawhan, ilabi na ang mga bata nga mas daling taptan, niadtong dekada 80. Gisulat ang maong track ni John Pardillada kinsa miangkon nga siya mismo wala makaikyas sa korikong sa dihang siya bata pa, hinungdan nga nahuna-hunaan niyang isaysay ang maong kasinatian nga karon iya na lang gikataw-an, "pagkapait sa akong pagkabutang/puros katol akong kalawasan/sige'g kutkot hangtod nga mawagtang/lami'ng ibag-id sa kalibunan."

Usab gihimakak ni Evert nga siya kanhiay nga kritiko sa musikang Bisrock. Iyang gipasabot nga dili tinood ang mga huna-huna nga nisakay lamang siya sa Bisrock tungod kay nakakawhat naman kini sa pagtagad sa mga tigpaminaw.

Siya nagkanayon nga pipila ka tuig ang nilabay, ang pundok nagsugod na og latid og mga kantang Bisdak sama sa "Selosa". Apan wala lamang kini mahatagi og airplay sa dihang ila kining gi-sumite sa dyRT sa kanhi tulumanong "Brown Underground Sounds".

"Pagkatinood lang gyud, dako kaayo nang sayop moingon sila that after experimenting with music genres, I have jumped into the Bisrock bandwagon for its popular support kay diha na nang song namong "Korikong" summer of 2005 pa. Depensahan lang nako ang attack batok nako nga nanaway ko sa Bisrock music kay pagkatinood kon nanaway pa ko, wala ta ko nikanta aning line-up of songs namo ron," panapos ni Evert.

Alang sa uban pang impormasyon, text sa Stonestomp sa numero isip 0918-4252988 (Evert) ug 262-1283/0919-6423675 (Morris). Bisitaha ang www.myspace.com/stonestomp.