Gwen sumsuman sa mga libak

Napuno karon sa libak si Gwen Garci human siya namahayag nga nangluod na siya sa Viva Films tungod kay hangtud karon wala pa gihapon siyay launching movie.

Ang taho sa PangMasa mao nga naglaraw na karon si Gwen nga mobuwag na sa hingpit gikan sa all female group nga Viva Hotbabes sa pamasin nga molambo ang iyang career.

Apan ang mga himantayon nagkanayon nga angayan usab nga hunahunaon ni Gwen kong nahimuot ba usab kaniya ang iyang mother studio sa mga eskandalo nga nalambigitan kaniya.

Suma pa nga siguradong wala ikalipay sa Viva ang mga cheap nga isyu ni Gwen sama na lang sa iyang reklamo nga gikulata siya sa iyang uyab, ang ilang away ni Ethel Booba ug labaw sa tanan ang iyang pagsayaw didto sa Boracay samtang gisab-ungan og P20 ang iyang lawas sa usa ka foreigner.

Ai-ai, nakighawok og bagets sa Boracay

Wala na makugang ang mga balhibuon og baba didto sa kaulohan sa taho nga dunay kissing scene ang comedy queen nga si Ai-ai delas Alas kauban ang iyang batan-on nga uyab didto sa Boracay bag-o lang.

Suma pa sa mga himantayon, dili na shocking ang maong taho tungod kay kaniadto pa, nalambigit na sa mga controversial issues ang comedy queen.

Gawas pa dunay mga hulagway nga magmatuod nga nakighawkanay gayud si Ai-ai sulod sa usa ka bar didto sa Boracay, busa ang mga himantayon miingon nga angayan nga iampo nalang nga magmalipayon ang comedy queen sa kiliran sa iyang uyab karon.

Rebecca Lusterio dunay scholarship

Tua na diay sa Cavite ang Boholana nga si Rebecca Lusterio ug karong Hunyo, scholar siya sa usa ka iladong unibersidad didto unya sa kaulohan.

Ang taho sa PangMasa nagkanayon nga nalooy kang Becang ang mga kadagkuan sa university hinungdan nga gihatagan siya og scholarship human namantala nga walay ikasarang ang iyang pamilya aron siya makatekang sa kolehiyo.

Si Rebecca alang niadtong nakalimot na mao ang bata kaniadto nga lumad nga taga Panglao Bohol nga misikat human siya makadaug og awards isip child star pinaagi sa pelikulang Muro Ami nga gibitoonan ni Cesar Montano.

Dose anyos pa lamang si Becang niadto apan bisan pa man sa mga offers wala gayud siya manumbaling tungod kay damgo niya nga makahuman sa pagtuon busa nagpabilin siya sa Panglao.

Two years ago, gipaapil na usab ni Cesar si Becang sa pelikula sa nahauna nga Panaghoy sa Suba diin napili siya isip best supporting actress apan wala niya madawat ang iyang trophy tungod kay nakauli naman siya didto sa Bohol.

Karon nga mi-graduate na siya sa high school damgo ni Rebecca nga makahuman sa kolehiyo ug sa samang higayon magmalambuon na sa hingpit ang iyang pag-artista.