Hugyaw nga mga mugna

Sayaw, awit ug duna usay mga nagyawyaw isip pagpaila sa ilang mga mugna. Kini maoy mga talan-awon nga naghimong mabulokon sa Miss Mandaue Talent's Night niadtong Lunes sa gabii didto sa Mandaue City Heritage Plaza. Labihan ka hugyaw sa gipakitang mga talento sa 20 ka mga kandidata, silang tanan puno sa pamasin nga masulod sa top five talents.

Human sa kapin duha ka oras nga tigi sa ilang mga tinan-ugan nga talento nakita gayud dayon ang katag kinsa ang haom nga masulod sa sirkulo sa lima ka mga kandidata nga maoy pilian isip best in talent. Ang mga nauyonan sa judges nga haom nga masulod sa top five mao sila si candidate number 7 Bjanesha Manigsaca, kinsa mihatag og backgrounder diin ug nganong nahimugso ang sayaw nga Curacha.

Nataypan usab sa mga judges sila si candidate number 9 Anais Nuñeza, candidate number 17 Nicole Schmitz ug candidate number 20 Isadora Maidee Gonzales kinsa mipaambit sa ilang nindot nga tingog. Apan ang labing giabibahan sa tanan mao si candidate number 19 Richelle Therese Borja kinsa labihan ka hugyaw sa gihimo niining ethnic dance, kumbinasyon sa singkil ug fire dance.

Samtang wala man tuod masulod sa top five apan gipakpakan usab sa publiko mao si Phoebecates Perez nga mipakita sa iyang kahanas sa dance sport. Naukay usab ang mga nanan-aw kang candidate number 15 Roxanne Cabañero nga mikanta ug sa dihang milugwa na siya kalit lang nagtinagalog pinaagi sa pag-ingon nga " hello concert po tayo." Perteng pakpak sa mga tawo kang Cabañero nga game ra usab kaayo nga miwarawara sa iyang kamot dayong pahiyom.

Ang candidate number 2 nga si Maria del Carmen Garcia misayaw og sama sa kang Jennifer Lopez, samtang ang candidate number 14 nga si Monique Carole de Leon nanundog usab sa estilo ni Shakira. Nagbilin usab og impresyon sila si candidate number 11, Kath Lyn Atuel ug candidate number 16 Joan Babor kinsa pareho nga mipakita sa ilang kahibaw sa belly dancing.

Ang resulta sa maong talents night ipahibawo unya atol sa pageant night karong Sabado diha sa Mandaue Sports Complex. Dungan niini, gibalikbalik usab pagpahibawo nga wala pay napili nga "Darling of the Press" ug gani wala pa makwenta ang boto sa mga sakop sa media nga mitambong sa presscon didto sa Super Metro Mandaue niadtong nakalabay nga semana.